ЕДЖЫД КАЙЯС
Ми Модест Ивановичкӧд, миян сиктса учителькӧд, сёрнитчим шойччан лунӧ ветлыны вуграсьны. Поводдяыс мича, да и лымйыс абу на джуджыд. Мунім ми Ыджыд тыӧ асывнас водз. Ме сувті берегсяньыс неылӧ, а ёртӧй муніс водзӧджык. Пока ме ледобурӧн писькӧдалі розьяс, ывлаыс дзикӧдз югдіс, а шондіыс эз на пет. Вӧйті куим вугыр. Ветлӧдла ӧтарӧ-мӧдарӧ, видзӧдала табъяс, но найӧ оз вӧрны. Чери оз сёй, буракӧ, узьӧ на.
Ме дорті неыліті прӧйдитіс ещӧ ӧти вуграсьысь, ыджыд тушаа, ён дядьӧ. Войнас лымйыс чорзьӧма да сы кок улын шаракылӧ да дзуртӧ. Шондіыс да тӧлыс вӧчӧмаӧсь лым вылас быдсяма пӧлӧс узоръяс да ещӧ вевттьӧмаӧсь вӧсни-вӧсни йи кеньӧн, быттьӧ югыд стеклӧӧн.
Вӧр сайсянь ньӧжйӧникӧн гӧгыльтчис-мыччысис шонді — ыджыд, гӧрд, кӧдзыд. Югыда дзирдалысь лым вывті сылӧн югӧръясыс писькӧдчисны алӧйгӧрд визьӧн и ме дорӧдз. Пукала ящик-кӧрӧб вылын да виччыся, кор нин табйӧй вӧрзяс. Друг менам юр весьтын мыйкӧ шувгыштіс да месянь неылӧ пуксис лэбач чукӧр. Лэбачьяс котралӧны, чирзӧны, корсьӧны сёян. Думайта, мися, пышкайяс чирзӧны. Видзӧдлі бурджыка: сэні абу пышкайяс, а на кодь жӧ негырысь лэбачьяс, но абу рудӧсь, а еджыдӧсь, сӧмын налӧн мышку вылас сьӧд визьяс. Да тайӧ жӧ еджыд кайяс. Водз таво локтӧмаӧсь тӧвйыны. Водз тулысын найӧ лэбӧны ылі войвылӧ, тундраӧ, сэні быдтысьӧны, колльӧны гожӧм-арсӧ. Тӧв кежлас локтӧны татчӧ, матӧджык йӧз оланінӧ.
Ме чирйи ыджыд шӧрӧм нянь да койышті налы. Первойсӧ найӧ, буракӧ, повзисны да лэбисны, но вӧчисны неыджыд кытш, бӧр пуксисны да зіля кутісны кокавны нянь чиръяссӧ. Кысянькӧ друг павгысис на дінӧ рака. Посни лэбачьяс эз повзьыны сыысь, а кыпӧдісны сэтшӧм шум, кӧть пельтӧ тупкы. Найӧ ӧтчукӧрӧн, гораа чирзігтыр, чеччалісны, жбыръялісны сы гӧгӧр, усьласисны, и ракалы быть лои мунны на дорысь.
Ме видзӧді на вылӧ да любуйтчи налӧн повтӧмлунӧн, налӧн збойлунӧн, а табйӧй менам, вӧлӧмкӧ, важӧн нин вӧйласьӧ. Гашкӧ, ме дыр на видзӧді на вылӧ да любуйтчи, но найӧ друг кыпӧдчисны да лэбисны... Мыйла? Вӧлӧмкӧ, ме дорӧ локтӧ ёртӧй. Модест Иванович месянь неылӧ писькӧдіс выль розь да ӧтлаын мӧдім вуграсьны. А еджыд кайясыс? Мед найӧ гажӧдӧны и мукӧдъясӧс.
