ПРИМЕТА

Гожӧмлысь арӧ вуджӧмсӧ пӧшти он и казяв, вуджӧ ньӧжйӧ, тэрмасьтӧг. А вот ар бӧрын тӧлыс локтӧ чожа, крута. А частӧ овлӧ и сідз, мый узьны водан арын, а асывнас чеччан тӧлын. Мыйкӧ татшӧм сяма лоис таво. Правда, арыс вӧлі мича и лышкыд. Зэрис этша, йӧзлы сетіс позянлун идравны урожай да заптыны тӧв кежлӧ тшак-вотӧс. Октябрь помын кӧдздӧдыштіс, войяснас кутіс пужъявны. Сэсся бара шондӧдыштіс, лӧнис.

Ӧти татшӧм асылӧ менӧ чуксаліс Юля, внучка.

— Чеччы, — шуӧ, — лыжиястӧ колӧ дасьтыны... Видзӧд, войнас тӧв пуксьӧма.

Ме чеччи да видзӧдлі ӧшиньӧд. Збыль ставыс еджыд. Войбыдӧн сапкӧма уна, кӧнкӧ, весьт судта лоӧ. Асылыс ыркыд.

— Но, мый? Ветлам лыжиӧн Веж ты дорӧдз? — эз лэччысь Юля.

— Да, тэ эн тэрмась!.. Ме талун ог эшты... Колӧ сельсӧветӧ лэччывны да и школаӧ пыравны пионеръяс дорӧ. Важӧн нин сэні эг вӧв.

...Школаын ме манитчи вель дыр. Гортӧ локті рытъявылыс нин. Дзик ӧшинь улын паныдасис менам тӧдса вӧралысь Иван Иванович, аслас «Буранӧн» гӧнитӧ. Лэптылі киӧс, сувтіс.

— Чолӧм-здоров, сосед! Кытчӧ нин ветлін Сивко-бурконад?

— Да, ягӧ кайлі, — тэрмасьтӧг кывъяссӧ тэчис. — Видзӧдлі ассьым важ угодьеяс...

— Но и мый? Вӧравны заводитан?

Сосед чӧв оліс, мыйкӧ, буракӧ, думайтіс. Перйис зепсьыс папирос пачка.

— Лымйыс, чайтан, оз нин сывлы? — бара юалі ме...

Иван Иванович бара нинӧм эз шу. Ӧзтіс папироссӧ, кыскыштіс гоз-мӧдысь, сэсся вӧлисти шыасис:

— Оз нин сыв, шуан? Ог тӧд!.. Ме талун ягысь ош кок туй аддзылі. Свежӧй лым вывті тапикасьӧма... А сійӧ, другӧ, лым вывтіыд гуас оз пыр, — мед кок туйсӧ не кольны...

— Сідзкӧ, сывлас на?

— Сывлас, дерт!

И збыль, лун куим мысти став лымйыс сылі, быттьӧ абу и вӧвлӧма.