ЮЛӦН ГОР

Мизин ю ичӧт, но визув, сӧстӧм. Миян сикт дорті сійӧ вӧчӧ ыджыд кӧдж, быттьӧ сиктсӧ кӧсйӧ босьтны кытшӧ. Мунны кӧ ю пӧлӧныс, кӧджӧдыс, ковмас пӧшти быдса лун воштыны, а веськыдавны кӧдж вомсӧ час оз ковмы.

Гожӧмын ю дорын лӧсьыд, гажа. Ляпкыдджык берегъяс пӧлӧн овмӧдчӧмаӧсь бадь пуяс. Найӧ лун-лун видзӧдӧны ваас да варовитӧны юыскӧд. Вылынджык — льӧм пуяс. Тулысъясын найӧ дзоридзалӧны сідзи, мый ылісянь кажитчӧ: кодкӧ берег дорсӧ вольсалӧма еджыд дӧраӧн. Кӧнсюрӧ берег пӧлӧныс шевкнитчӧмаӧсь кыддза расъяс. Муыс сэні вольсалӧма веж вольӧсӧн, а вылынджык, пуяс вылын, дугдывтӧг дзользьӧны лэбачьяс. Льӧм пуяс да кыдзьяс костӧ тӧрӧдчӧмаӧсь сэтӧр кустъяс, жельнӧгъяс.

Мунан берег пӧлӧныс, любуйтчан став тайӧ мичлуннас и друг кылан: кӧнкӧ водзын мыйкӧ сёльӧдчӧ... Коді, мый? А сёльӧдчӧм шыыс пыр содӧ и содӧ. Матыстчан сэтчӧ, и сэні вӧлӧмкӧ ичӧтик кось, — визув ваыс гораа сёрнитӧ гальки изъяскӧд. И тадзи быд гожӧм кылан юлысь горсӧ, сылысь сьылӧмсӧ.

Ар. Кӧдздӧдіс. Друг ӧти войӧ берег дорын едждісны пуяс, быттьӧ пӧрысьмисны, дзормисны... А мича ю тупкысис стеклӧ кодь югыд йиӧн. Видзӧдан да йи пырыс тыдалӧ быд из, быд турун сі. Ӧні сӧмын оз нин кыв юлӧн горыс, сылӧн сьылӧмыс.

Регыд и сійӧ шебрасяс дыр кежлӧ еджыд эшкынӧн. Гажа тулысӧдз, мича юӧй!