МЕНАМ РӦДНӦЙ ВӦР-ВА

Ме ичӧтысянь радейтлі вӧр-ва. Менам дедӧй частӧ нуӧдліс менӧ вӧрӧ. Мунан-мунан вӧлі да пуксян пӧрӧм пу вылӧ шойччыштны, и сэки заводитас висьтавлыны вӧр-ва йылысь, сылӧн мичлун да лышкыдлун йылысь, зверь-пӧткалӧн олӧм йылысь, налӧн пӧвадкаяс йылысь интереснӧй висьтъяс. Бӧрынджык ачым, ӧтнам либӧ другъяскӧд, уна кад коллявлі берег дорын, ветлӧдлі ичӧтысянь тӧдса местаясті, рӧднӧй вӧр-ваті. Векни трӧпаӧд мунан муяс да видзьяс вомӧн либӧ берег пӧлӧн, нырад тэныд чамгӧ юртӧ кольмӧдана дзоридзьяс да ма кӧра сынӧд. Сьӧлӧм вылад кокни, долыд...

Торйӧн нин лӧсьыд вӧрын гожӧмнас. Мунан и тэнӧ паныдалӧны да колльӧдӧны лэбачьяслӧн сьылӧмыс. Со ур пӧрӧдӧма тшак, но нунысӧ абу удитӧма, кодкӧ торкӧма. Мыйсӧ сӧмын он аддзыв гожся вӧрысь?! Вот сэки тэ пуксян мыр вылӧ, зепсьыд перъян ичӧтик блокнот да пасъялан сэтчӧ аддзылӧмторъяссӧ.

Неважӧн меным сюри ӧти татшӧм важ блокнот, и сійӧс листайтігӧн, ме быттьӧ выльысь волі радейтана местаясӧ, лолалі чӧскыд кӧра сӧстӧм сынӧдсӧ, и меным окота лои висьтавны йӧзыслы миян вӧр-валӧн мичлун, лышкыдлун да сылӧн неыджыд гусяторъяс йылысь.