СО КЫДЗИ КОЛӦ УДЖАВНЫ!

Ставреспубликаса старӧста — Калинин ёрт — СССР Сӧветъяслӧн 3-ӧд съезд вылын ёна висьталіс, кыдзи колӧ бурджыка уджавны Сӧветъясын, кыдзи лӧсьӧдны местаяс вылын (сиктъясын, вӧлӧсьтын) Сӧвет удж нуӧданінъяс.

Медвойдӧр колӧ Сӧвет власьт дінас ёнджыка матыстны крестьянаӧс, колӧ Сӧвет уджыскӧд дзикӧдз йитны налысь оласногнысӧ.

Местаяс вылын уджыс оз на зэв шыльыда мун. Кӧнсюрӧ весиг бура удж нуӧдӧм пыдди уджсӧ торкӧны-падмӧдӧны. Исполкомъясӧ, сельсӧветъясӧ уналаын сюйсьӧны лёк йӧз; найӧ уджалӧны прӧтив, зільӧны асланьныс, увтыртӧны Сӧвет власьтӧс. Колӧ Сӧветъясӧ йӧзӧс бӧрйигӧн гӧгӧрбок артавны: позьӧ-ӧ тайӧс либӧ мӧдӧс Сӧветӧ бӧрйыны, вермас-ӧ сы помысь крестьяналы бурыс лоны, оз-ӧ сійӧ кут мӧдарӧ (омӧльлань) кыскыны‐личкыны? Сизим воӧн быдлаын нин крестьяна тӧдмалісны ас вӧлӧсьтувса йӧзтӧ, казялісны нин, коді кытчӧ нырсӧ кыскӧ. Медся ёна колӧ ӧтувтчыны (топӧдчыны) гӧль крестьяналы шӧркоддьӧмъяскӧд да ӧтвылысь видзны ассьыныс правасӧ, медым некутшӧм ногӧн эз веськавны Сӧветъясӧ кулакъяс, Сӧвет власьтлы паныд мунысьяс — найӧ оз зільны крестьяналысь овмӧс кыпӧдны ни, Сӧвет удж бурмӧдны ни.

Сэсся крестьяналы колӧ унджыкысь тӧдмасьны, кутшӧма мунӧ уджыс Сӧветъясын, лючки-ӧ уджалӧны сэтчӧ бӧрйӧм йӧзыс. Колӧ корны, медым найӧ частӧджык вӧчалісны докладъяс крестьяналы. Кыткӧ кӧ неладнӧ — колӧ индыны сы йылысь. Шуны кӧ, крестьяналы колӧ непӧштӧ Сӧветъясӧ йӧзӧс бӧрйыны, колӧ тшӧтш и налысь удж нуӧдӧмсӧ юасьны (критикуйтны).

Сӧмын тадзи уджалігӧн вермам регыдджык шыльӧдны сиктса Сӧветъяслысь уджсӧ, кыпӧдны крестьяналысь овмӧссӧ, ёнмӧдны ассьыным государствонымӧс.