ПОШТА КУД

Сыктывдінкар. № 201. Тіянӧс ыстысьыс абу, тыдалӧ, водзвыв сёрнитӧма Левичыскӧд. Ӧні кӧ ӧд быдӧнӧс кутан дон босьттӧг лэдзны, киносӧ лоӧ тупкыны, сьӧмыс нинӧм оз чукӧрмы, рӧскодыс вӧлі да.

«Кодкӧ»-лы, Сыктывдінкар. «Кандидат» стихыд оз мун газетӧ. Сы йылысь мед Обсоюзыс ачыс лӧсьӧдас — тэ ӧд, буракӧ, сэні уджалан, висьтав сэтчӧс юралысьясыслы Ӧсип Иван йывсьыд.

Поёл. Паджга. Варышлы да Варыш пилы. Дзик нинӧмсӧ ті гижад газетӧ. Кодлы нӧ окота лыддьыны кутшӧмкӧ нывлысь зон мырддьӧм да нывъяслысь зонъяскӧд гуляйтӧм. Гижӧй сиктса удж йывсьыд, сэки газетӧ лэдзам.

Кӧрткерӧс. Спира Прокӧлы. «Со коми йӧзыд» газетын оз мун. Гижӧдыд некодлы нинӧм оз сет.

Сыктывдінкар. Ӧльӧк Ӧндрейлы. «Коми йӧз важ олӧмысь казьтыштӧм» газетын статьяыд оз мун, оз лӧсяв миян газетӧ. Уна лёк войдӧртӧ вӧлі, сы йылысь тӧдӧны быдӧн, весиг том йӧз.

Сыктывдінкар. Домна Васьлы. Ленин ёрт йывсьыд газетын оз мун. Ӧти-кӧ, зэв уна гижӧмыд, мӧд-кӧ, Ленин ёрт йывсьыд нигаясын зэв уна гижӧма, быдӧн вермасны быдлаысь судзӧдны.

Погост. Сажинлы. «Газет лыддьыны оз сетны» гижӧдыд оз мун газетын. Лавкаыд ӧд абу газет лыддянін, сы вылӧ эм лыддьысян керка.

Палаззя. Аддзылысьлы. Перна йывсьыд колі сэки и гижны. Ӧні нинӧмла нин. Газетын оз мун.

Кулӧмдін. Селькорлы. «Нывбаба кост уджалӧм йылысь». Статьяад гижан ӧти морт йылысь. Тэ гиж миянлы сылысь ним-овсӧ, сэки лэдзам газетӧ, дӧзмӧмысь повны нинӧм.

Лӧзым. Уджалысьлы. «Со ӧд кутшӧм кассирша» гижӧдыд оз мун газетын. Зэв поснитор йылысь гижан.

Позтыкерӧс. Перӧлы. Комсомол паска йывсьыд сёрмис, газетын оз мун.

Пӧддельнӧй. Бугуйлы. «Вот и комсомолеч» гижӧдыд оз мун газетын. Ачыд гижан, абу пӧ нин сійӧ комсомолеч.

Айкатыла. Кай Варышлы. «Самӧкур пызьтӧ» ыстім Административнӧй юкӧдӧ.

Мордін. Ӧтиклы уна пиысь. Столӧвӧй йывсьыд оз мун газетын. Тэ, буракӧ, ӧтчыд сӧмын волӧмыд, либӧ прӧста гижан. Тӧдмавлім да, абу сідзи.

Кулӧмдін. Ч. Ӧ. Гижӧдъясыд газетын оз мунны, оз позь зэв эскыны (веритны) гижӧдъяс вылад да. Гижин: «Быд лун комсомол содӧ 20 мортӧн...» Сэтшӧмыс уна эм. Сэсся гижныд абу зільӧмыд, кыкнан бокас карандашӧн нырӧмыд.

Кӧрткерӧс. Тювгысьысьлы. Моски йывсьыд газетын оз мун. Ичӧттор йылысь гижан.

Паджга. Видзӧдысьлы. Гижӧдъясыд оз петны газетын. Гижлім нин сы йылысь.

Маджа. Казаковлы. Комсомол паска йывсьыд сёрмис.

Паджга. Чикышлы. Став юысь йывсьыд газетӧ он вермы гижны. Мӧд ногӧн кыдзкӧ колӧ вермасьны сійӧ лёкыскӧд. Газетын оз мун.

[...]