ОДЙӦНДЖЫК КОЛӦ ШЫБИТНЫ

Обласьтувса Видз-му Управленньӧӧ кыдзикӧ кужлӧма пырны служба вылӧ важ Кобраса (Сыктыв уездса) тӧргӧвӧй Митюшов Иван Васьӧ.

Сійӧ войдӧр вӧвлӧма Управаын шленын, сэсся Кобраын юралысьын. Йӧз уджӧн лӧсьӧдлӧма аслыс керка, мукӧдтор. Октябрса революция бӧрын аслас лёка олӧмла, крестьяна пӧсьӧн олӧмла лоӧма пышйыны аслас сиктысь Сыктывдінкарӧ. Ассьыс важ олӧмсӧ Митюшов ӧнӧдз пыр гусьӧн видзлӧма, некодлы абу висьтавлӧма ни, гижлӧма ни. Сы вӧсна и веськавліс сӧветскӧй служба вылӧ. Весиг пыралӧма видз-му да вӧр уджалысьяс союзӧ.

Ӧні, Кобраса Исполком гижӧд серти, став важ олӧмыс Митюшовлӧн югдіс. Сійӧс видз-му да вӧр уджалысьяс союзысь вӧтлісны. Тшӧтш кӧсйӧны шыбитны Видз-му Управленньӧысь. Ӧдйӧнджык колӧ. Нинӧм видзны сӧвет удж нуӧдысьясын баля ку пытшкӧ пырӧм кӧинъясӧс.

Ӧ. О.