ВОЧАСӦН КРЕСТЬЯНА КУТЧЫСЬӦНЫ ВЫЛЬ ОЛӦМӦ

Гӧстинӧй гӧра сиктын (Летка вӧл., Сыктыв уезд) май коймӧд лунӧ вӧлі крестьяналӧн собранньӧ. Сэні зэв ёна сёрнитісны уна переменаӧн видз-му уджалӧм йылысь да крестьяналысь сьӧкыд уджсӧ кокньӧдӧм йылысь. Ӧткымын пӧрысь йӧз ёна на паныд мунӧны выльногса уджалӧмлы.

Лючки гӧгӧр сёрнитӧм бӧрын собранньӧ шуис вуджны ӧні кежлӧ нёль переменаӧн му уджалӧм вылӧ. Медым уджыс бурджыка кутас мунны, корны агрономӧс индавны да велӧдны му-видз уджавны. Сэсся сёрнитісны нюр косьтӧм йылысь. Эм сэні «Пӧрӧм шор» нюр верст кузя кымын. Шуисны: корны отсӧг Визинса видз-му уджалан юкӧдлысь, сэсся бара жӧ корны агрономӧс, мед сійӧ бура видлалас да велӧдас нюрсӧ косьтыныс. Канава шуисны кодйыны верст кузя, сажень пасьта да сажень судта.

Сэсся кооператив пыр шуисны судзӧдны турун кӧйдысъяс.

Удждысян тӧварищество пыр собранньӧ шуис судзӧдны 5 плуг да куим тӧлӧдчан машина.

Колян во арнас ӧзимъяссӧ зэв ёна жугӧдіс лёльӧ; сы вӧсна лӧсьӧдісны корны торъя комиссияӧс видлавны ӧзимъяс, мед йӧзыс кутасны тӧдны, кутшӧм позьӧ виччысьны урожай.

Сэсся ёна сёрнитісны выль школа стрӧитӧм йылысь. Шуисны тэрмӧдлыны уездса исполкомӧс, мед сійӧ ӧдйӧджык плансӧ лӧсьӧдас да кер лэдзӧмнас тэрмасясджык, мӧд во пӧ мед позяс нин заводитны лэптыны школасӧ.

«Югыд туй» да «Крестьянскӧй газет» шуисны корны во кежлӧ; собранньӧ вылас жӧ чукӧртісны 1 шайт да 50 ур сьӧм газет вылас.

М. Сергиевскӧй.