ИНВАЛИДЪЯСЛЫ ДА ВОЙНА ВЫЛӦ УСЬӦМ СЕМЬЯЯСЛЫ ОТСӦГЪЯС СЕТӦМ ЙЫЛЫСЬ
Гӧрд армияын служитӧм вӧсна инвалидъясӧ воӧм йӧзлы, найӧ семьялы да война вӧсна вердысьсӧ воштӧм семьяяслы сетсьӧ со кутшӧм торъя праваяс:
Видз-му уджалан машина сетӧны уджӧн.
Машина ньӧбигӧн инвалидъяс мынтӧны дасӧд юкӧнсӧ машина доныслысь. Колян ӧкмыс пайсӧ дасӧд юкӧныслысь босьтӧны вочасӧн, ичӧтика прӧчент сьӧм виччысьӧмсьыс босьтыштӧмӧн: во чӧжӧн сӧмын 9 прӧчент.
Вӧр босьтігӧн
(пес вылӧ, стрӧитчӧм вылӧ, сідз водзӧ) такса серти донсӧ лэдзӧны. Лесничӧйяс вермӧны лэдзны такса серти доныслысь джынсӧ, уездувса видз-му управленньӧ вермас лэдзны 75 прӧчентӧдз, обласьтувса видз-му управленньӧ ньӧти дон босьттӧг сетны вермас.
Кӧйдыс,
колӧ кӧ сійӧс ньӧбны, инвалидъяслы медводз сетсьӧ. Сортируйтны кӧйдыстӧ медводз жӧ лэдзасны дай некутшӧм дон оз босьтны.
Видз-му кӧ оз тырмы да колӧ содтӧд, сэсся эм кӧ государственнӧй фондын (запасын) видз-муыс, инвалидъяслы видз-му закон чукӧр 158 статья серти медводзын сетсьӧ. 223−226 статьяяс серти, инвалидъяслы выль местаӧ мунны праваыс сетсьӧ медводз жӧ.
Сэсся сетсьӧны гырысь кокньӧдъяс (льготаяс) сельскокӧзяйственнӧй налог мынтӧмын.
Со кутшӧм кокньӧдъяс сетӧ Сӧвет власьт инвалидъяслы, висьысь да ранитчӧм гӧрдармеечьяслы, найӧ семьяяслы да война вылын усьӧм гӧрдармееч семьяяслы.
Кокньӧд либӧ отсӧг коригӧн шыӧдчыны колӧ сэтшӧм удж нуӧданінӧ, кодсянь колӧ отсӧгсӧ босьтны. Шыӧдчӧм дінас содтыссьӧ волисполкомсянь эскӧданпас эмбур йылысь, кокньӧд колӧм йылысь, сельхозналог мынтӧм йылысь. Сэсся эскӧданпасын колӧ индыны — кутшӧм категорияӧ инвалидсӧ пуктӧмаӧсь.
Таысь ӧтдор, колян во декабр тӧлысьын Россияса Сӧвет Республикалӧн Центральнӧй Исполнительнӧй Комитетыс да Совнаркомыс шуисны лӧсьӧдны инвалидъяслы, висьысь да ранитчӧм гӧрдармеечьяслы, найӧ семьяяслы отсасян комитет. Тайӧ комитетыс сетӧ быдсяма отсӧг: сьӧмӧн, кӧлуйӧн; лечитчыны тшӧтш отсалӧ.
Татшӧм отсасян комитетыс эм Центрын, быд губерняын дай обласьтын Исполкомъяс бердын.
Миян Обласьтын Обисполком бердын эм жӧ Обкомпом, кытчӧ колӧ шыӧдчыны инвалидъяслы, ранитчӧм да война вылын усьӧм гӧрдармеечьяслы, суас кӧ найӧс кутшӧмкӧ мог.
Г. М.
