МӦД ПӦВ КРЕСТЬЯНСКӦЙ ЗАЁМ ЛЭДЗӦМ ЙЫЛЫСЬ

Колӧ тэрмасьны ньӧбавны облигацияяс

Май 6-ӧд лунсянь став Сӧветса Республикаяс Союзын кутіс вузасьны мӧд пӧв колян вося крестьянскӧй заём. Тӧрытсянь (май 15-ӧд лунсянь) облигацияяс вузалӧны Сыктывдінкарын. Регыд кутасны вузасьны став Коми обласьт пасьтала.

Воддза заёмъяс вылӧ крестьяна видзӧдісны зэв бура. Ӧні ставныс нин тӧдӧны, кутшӧм пӧльза сетӧ заёмыд, торъя нин сельхозналогтӧ мынтігӧн. Сӧмын воддза заёмъяслӧн облигацияясыс вузасьлісны каръясын, деревняӧ вотӧдз вӧлі унджыксӧ ньӧбасны тӧргӧвӧйяс да спекулянтъяс.

Ӧнія заёмсӧ Сӧвет власьт матыстӧ крестьяналы дзик ныр улас, облигацияяссӧ кутасны вузавны деревняясын. Кӧзяиныс заём вылас лоӧ волисполком.

Быд вӧлӧсьтын лоӧ торъя уполномоченнӧй волисполкомса шленысь. Медым бурджыка муніс уджыс, медым крестьяна кокньыдджыка вермисны судзӧдны заёмыслысь облигацияяссӧ, сійӧ уполномоченнӧйыс кыскӧ (привлекает) отсасьысьясӧс: сельсӧветса шленъясӧс, мӧда-мӧдлы отсасян обществоса шленъясӧс, лыддьысян керкаясын удж нуӧдысьясӧс, велӧдысьясӧс, докторъясӧс, агрономъясӧс.

Сэсся, таысь кындзи, деревняясын облигацияяс кутасны вузавны кооперативъяс, пошта, сберегательнӧй кассаяс, мукӧд удж нуӧданінъяс.

Ӧні быд крестьянин вермас гортас ньӧбны заёмлысь облигацияяс, оз ков карӧ ветлыны да уджалан лунъяс сэтчӧ воштыны.

Пӧльза тайӧ заёмыс сетӧ зэв ыджыдӧс. Чӧлкӧвӧя облигация вузассьӧ 87 урысь (13 урӧн донтӧгджык), быд шайт вылӧ воӧ 5 ур доход (купоныс сетӧ).

Сэсся лоӧ квайтысь лотерея (розыгрыш): куимысь таво, мӧд куимысь локтан воӧ. Медводдза розыгрышыс лоӧ май 24-ӧд лунӧ Минск карын (Белоруссияын); мӧдыс лоӧ август 1-ӧд лунсянь Волга ю вылын, торъя баржа вылын; коймӧдыс — декабр 1-ӧд лунсянь Уралын, Свердловск карын (Екатеринбург).

Быд лотерея дырйи лоӧ кызь кык сюрс воӧм (выигрыш) 250 сюрс шайт дон. Тайӧ лотереяясас ӧткодя бергавны кутасны колян вося облигацияяс и выль пӧв лэдзӧмъясыс.

Кутшӧм облигацияяс вылӧ усясны воӧмъясыс, сы йылысь быд деревняӧ кутасны воны табличаяс, медым став крестьянаыс вермисны видзӧдны сэтысь: воӧма абу.

Облигацияяс кутасны вузассьыны ичӧтик срок дырйи: куим-ӧ-нёль тӧлысь сӧмын, сельхозналог мынтан 1-й срокӧдз. Сідзикӧ колӧ быдӧнлы тэрмасьны ньӧбны облигацияяссӧ.