1925−1926 ВО КЕЖЛӦ СЕЛЬХОЗНАЛОГ

Коми обласьт лӧсьӧдӧма 5-ӧд разрядӧ

Сӧветса правительство вӧчӧма (лэдзӧма нин) выль положенньӧ 1925−1926 вося сельскокӧзяйственнӧй налог йылысь.

Колян вося положенньӧ серти выльсӧ ёна вежлалӧмаӧсь:

а) чинтӧмаӧсь нормасӧ скӧтӧс муӧ лыддигӧн (вуджӧдігӧн): мӧсъяс кутасны лыддьысьны 4⁄10 десятина улӧ, вӧвъяс — 5⁄10 (десятина джын улӧ); колян во вӧлі лыддьысьӧны 6⁄10 десятина пыдди;

б) арлыдсӧ вотӧ пыран скӧтлы содтӧмаӧсь: колян во вӧлі налогӧ сюйӧны воӧн-джынъянаӧс, таво — кык восяясӧс;

в) видзьяс кутасны муӧ пӧртны (лыддьыны) со кыдзи: ойдлан видзьяс 35⁄100 десятина пыдди, ойдлытӧмъяссӧ — ¼ десятина туйӧ;

г) лӧсьӧдӧмаӧсь куим пӧлӧс ставкаяс: 1-ӧд ставка сертиыс мынтыссьӧ первой четверть (¼) десятинаысь сёйысь вылӧ (на едока); 2-ӧд ставка сертиыс мынтыссьӧ ¼ десятинасьыс лишнӧйыс куим четвертьӧдз (¾) сёйысь лыдӧ; 3-ӧд ставка сертиыс перйыссьӧ ¾ десятина мусьыс лишнӧйыс сёйысь юрӧ;

д) став ставкаыс тавося налогыслӧн чинтӧма лоӧ быд разрядысь 10 прӧчент;

е) местнӧй бюджетӧ таво оз содтысь торйӧн; сы вылӧ кутас торйӧдчыны государственнӧй налогсьыс (коймӧд юкӧныс);

ж) налог мынтан срокъяс лӧсьӧдалас Обласьтувса Исполком; местаяс вылын сійӧ срокъяссӧ вежлавны оз позь;

дж) налог кутас пуктысьны ӧтпырйӧ став кӧзяйствосӧ арталігӧн, сэки жӧ сетасны и окладнӧй лист;

з) налог сюйӧм бӧрын налог мынтысь вермӧ жалӧба сетны вӧлӧсьтувса налогӧвӧй комиссияӧ, срокыс сетсьӧ ӧти тӧлысь.

Миянлысь Коми обласьт Народнӧй Комиссаръяслӧн Сӧветыс лӧсьӧдӧма 5-ӧд разрядӧ. Регыд Обисполком лӧсьӧдалас налоглысь ставкаяссӧ быд уездлы, индас, кыдзи скӧтӧс да видзьяс вуджӧдны (пересчет) муӧ. Став йывсьыс лоӧ йӧзӧдӧма (газетӧ лэдзӧма) юнь 1-ӧд лунӧдз.

Обласьтувса Финансӧвӧй юкӧд ӧні зэв зіля уджалӧ, лӧсьӧдчӧ, кӧсйӧ юнь 1-ӧд лун кежлӧ став уджсӧ та йылысь помавны да босьтчыны местаяс вылас нин уджавны, учёт вӧчны.

Выль положенньӧнас тӧдмасьӧм кузя май 18-ӧд лунӧ Сыктывдінкарын воссьӧ дженьыдик курс налогӧвӧй удж нуӧдысьяслы, курс вылас тшӧтш корасны волисполкомса секретаръясӧс, кодъяс ӧні курс вылынӧсь жӧ карас.

Кӧть таво миянлысь обласьтнымӧс сюйӧмаӧсь 5-ӧд разрядӧ (колян во вӧлі 4-ӧдын), налогыс оз сод — чинӧ бура уна. Обласьтувса Финансӧвӧй юкӧд водзвыв артыштӧма да шуӧ: став обласьт пасьтала пӧ налогыс лоӧ 209.024 шайт гӧгӧр — колян во вӧлі 340.015 шайт.

Став колян вося кокньӧдъясыс (льготаяс) гӧль крестьяналы, гӧрдармееч семьяяслы, инвалидъяслы, милицияын служитысьяслы — сідз жӧ лоӧны и таво.

Ми аддзам, Сӧвет власьт пыр вочасӧн чинтӧ налогтӧ. Колян во серти таво чинтӧма 40 прӧчент гӧгӧр.

Коми крестьяна, лӧсьӧдчӧй выль налог мынтігкежлӧ!