ПОЗЬӦ-Ӧ ПУКТЫНЫ ЛЫДДЬЫСЯН КЕРКАӦ УДЖ НУӦДЫСЬӦН?

Комсомол ячейкаын омӧля уджалӧ.

Паджгаын (Сыктыв уездын) лыддьысян керкаын удж нуӧдысьыс ӧнӧдз вӧлі Габов ёрт. Ӧні сійӧ лыддьысян керкаысь петіс. Сы местаӧ пырны Паджгаса волполитпросветкомӧ том йӧзлӧн вӧлі сетӧма вит заявленньӧ. Волполитпросветком шуӧма пуктыны вит морт письыс Тимин ёртӧс.

Тимин ӧнӧдз вӧлі, дай ӧні на пыр, Гаръя сиктса комсомол ячейкаын секретарын. Веськыда кӧ шуны, ячейкаас сійӧ уджалӧ зэв омӧля. Тшӧкыда овлывлӧ, ячейкаыслысь собранньӧ чукӧртас да ачыс оз и волы. Комсомолечьяс собранньӧ вылын виччысясны-виччысясны, да сідзи бӧр лоӧ мунавны. Тимин ёрт весиг оз зіль уджавны. Сэсся уджавнысӧ оз куж. Ячейкаас уджыс дзикӧдз нин кусны кутӧма.

Май 1-ӧд лунӧ комсомолечьяс петісны нуӧдны уджалысь йӧзлысь праздниксӧ. Тимин гортас уджавны кольччис, эз пыдди пукты татшӧм ыджыд праздниксӧ.

Тиминлы кык верст сайсянь дыш вӧлі комсомол ячейкаас волывлыны. Лыддьысян керкаӧдз сэсянь лоӧ верст нёль-вит да, ӧдвакӧ нин пондас сійӧ воссьывны. Та йылысь, тыдалӧ, Паджгаса волполитпросветком абу и думыштлӧма.

Сэні жӧ вӧлі заявленньӧ комсомолка Мартынова Марьялӧн. Сійӧ быд уджын зіль. Паджгаса том йӧз, 120 морт, ассяньыс гижлісны волполитпросветкомӧ Мартынова йылысь, корлісны пуктыны сійӧс лыддьысян керкаын удж нуӧдысьӧ. Ме ногӧн кӧ, эськӧ Мартынова ёрт бурджыка нуӧдіс уджсӧ Тимин дорысь. Сэсся сійӧ эськӧ зілис кыпӧдны удж Паджгаса пемыд нывбабаяс пӧвстын.

Ме чайта, Визинса Уполитпросвет видзӧдлас тайӧ гижӧд вылӧ да шуас: позьӧ-ӧ Тиминӧс пуктыны лыддьысян керкаӧ удж нуӧдысьӧ. Визинса Укоммоллы тшӧтш колӧ тӧдмавны Тиминӧс да сылысь уджалӧмсӧ ячейкаас.

Паджгаса ёрт.