ПОП ПИОНЕРКӦД

Поп шуӧма: «Колӧ кӧ рай — клубӧ эн кай». Пионер воча кыв видзӧма: «Ылӧдлы пемыд йӧзтӧ, абу кӧ яндзим».

Ручын (Кулӧмдін уездын) ыджыд лун дырйи крестӧн ветлігӧн поп-дяк волӧмаӧсь Савельев монь ордӧ (Савельевыс вӧлі купеч). Сылӧн эм пи, Шура нима, пионер. Славитӧм бӧрын попыд кутас окӧдавны крестӧн. Пионерыд кресттӧ оз окав, шуас: «Тіянлысь висьӧм новлӧдлан чачатӧ ог жӧ кут окавны». Попыд сэсся мӧдас дольны пионерыдлы: «Оз ӧд ков ентӧ вунӧдны, ентӧ кӧ вунӧдан — сійӧ асьтӧ вунӧдас; тэ велӧдчан на школаын, енмыд тэныд отсалас на и велӧдчыныд. Клубад ветлӧмысь колӧ дугдыны — сійӧ грек, кулӧм бӧрад сӧмын мӧдаръюгыдын овныд сьӧкыдджык лоас. Праздник лунъясӧ колӧ быд сьылігкежлӧ волыны вичкоӧ, сэки толькӧ верман дугдыны клубад лёк йӧз пиӧ ветлӧмысь, клубса йӧзыд ентӧ вунӧдӧмаӧсь, оз ков коммунистъяслысь кывзыны, нэм кежлад вошан. Эн вунӧд попъястӧ, миян дінӧ лок ид тыра пожйӧн — тэнӧ шуам раба божйӧн».

Унатор на долис эськӧ да, кывзысьыд некод эз ло, лои ланьтны. Пионерыд сылы воча шуис: «Весьшӧрӧ кывтӧ эн мудзты, мед тырмас дырджык пӧрысь йӧзтӧ ылӧдлыны. Ме лучшӧ ветла клубад, сэні велӧдӧны миянӧс выль ногӧн овны, мунны Ленин индӧм туйӧд. Мун „бласлӧ кристосӧн“ ылӧд ещӧ пуд-мӧд няньтӧ да шайт-мӧд деньгатӧ гӧгӧрвотӧм йӧзыдлысь, абу кӧ гӧль йӧзсьыд яндзимыд».

Пионерыд абу и кывзӧма попыдлысь, май 1-ӧд лунӧ спектак вылын йӧзлы лыддис рочӧн стихотворенньӧ «1-е мая».

Пионеръяс, водзӧ тадзи мунӧй, энӧ кывзӧй попъяслысь сёрнинысӧ!

Радио.