СОФИЯСА СОБОР ВЗОРВИТӦМЫСЬ СУД

Революционер гӧтов повтӧг кувны аслас удж вӧснаыс

Вена. Софияса собор взорвитӧм йылысь суд эштӧ нин. Кывзісны медбӧръя кыввисьтъяс мыжданаяслысь. Мыждана Фридман висьталіс: Коммунист Интернационалкӧд пӧ ме гижасьлі, сӧмын пӧ коммунист партия оз ошкы ни оз тшӧкты ӧткӧн-ӧткӧн капиталистъяскӧд косясьны; сійӧ пӧ велӧдӧ став рабочӧйяскӧд да крестьянакӧд ӧтвылысь вӧчны революция. Сэсся мыждана Фридман корӧ: судитанныд кӧ пӧ вины, лыйлӧй пӧ менӧ, сэки пӧ ме кула салдат моз кось дырйи аслам удж понда, смертьыслы пӧ синмас веськыда, повтӧг видзӧдӧмӧн.

Судлӧн приговорыс.

Софияса собор взорвитӧмысь суд вӧчис со кутшӧм приговор: Загорскӧйӧс, Фридманӧс, Абаджиевӧс, Димитровӧс, Гренчаровӧс, Петриниӧс, Косовскӧйӧс да Коевӧс — казнитны ӧшӧдӧмӧн (джагӧдӧмӧн); Даскаловӧс — квайт во пукӧдны; Камауровӧс — 3 во кежлӧ. Загорскӧйӧс кындзи, ставнысӧ казнитасны йӧз син водзын (публичнӧй площадьяс вылын) София карас. Абаджиевос, Димитровӧс, Гренчаровӧс, Петриниӧс да Косовскӧйӧс вӧлі войдӧр нин виӧмаӧсь, дзик пыр соборсӧ взорвитӧм бӧрын. Ӧні колины казнитны сӧмын 3 морт: Загорскӧй, Фридман да Коев.

Выль суд панӧны. — 43 мортӧс лӧсьӧдчӧны казнитны.

Софияса собор взорвитӧм бӧрын болгарияса карын — Врацаын — арестуйтісны зэв уна мортӧс. Прокурорыс панӧ на вылӧ суд. Судас кыскӧны 43 мортӧс. Мыждӧны найӧс правительстволы паныд уджалӧмысь. Прокурорыс ставсӧ, 43-нан мортсӧ, тшӧктӧ судитны казнитны (вины).