КРУТОТЫЛАСА КРЕСТЬЯНА КӦСЙӦНЫ УДЖАВНЫ ВЫЛЬ НОГӦН

Апрель 22-ӧд лунӧ Крутотыласа (Летка вӧлӧсьтын, Сыктыв уездын) крестьяналӧн вӧлі скод. Сёрнитісны видз-му уджалӧм йылысь. Медвойдӧр шуисны: му уджавны

УНА ПЕРЕМЕНАӦН.

Найӧ шуисны: куим переменаӧн му уджалігӧн ми дзик пӧгибӧ кутім воны, ӧти спасенньӧ — вуджны уна переменаӧн уджавны. Корӧны велӧдчӧм йӧзӧс отсавны налы тайӧ уджас воӧдчыны — сӧветӧн и индалӧмӧн. Ёна корӧны агрономъяссянь туйдӧдӧм.

НЮР КОСЬТЫНЫ КОЛӦ.

Дзик Крутотыла бердас эм нюр, верстӧн-джынйӧн кузьта, верст пасьта. Нюрыс вайӧ крестьяналы уна вред. Крестьяна шуисны босьтчыны тайӧ нюрсӧ косьтыны. Сӧмын налӧн оз судзсьы вынныс ни сьӧмныс. Ковмас пӧ велӧдысь морт дай машинаяс. Корӧны индыны, кытчӧ колӧ шыасьлыны та йылысь, кытысь корсьны сьӧм, кыдзи кутчысьны тайӧ уджас.

ТУРУН КӦДЗНЫ.

Сэсся крестьяна шуисны: уна переменаӧн му вӧдитігӧн ковмас кӧдзны му вывъясад турун да ӧти вося няньяс. Судзӧдны шуисны турун кӧйдысъяс: бобӧнянь, тимофеевка, вика да мукӧд пӧлӧсӧс. Тайӧ уджыс медым бурджыка кутас мунны, бара жӧ корӧны велӧдчӧм йӧзӧс туйдӧдны.

«ЮГЫД ТУЙ» ГАЗЕТ

шуисны судзӧдны квайт тӧлысь кежлӧ, май 1-ӧд лунсянь.

М. С.