СОФИЯСА СОБОР ЖУГӦДӦМЫСЬ СУД

Прокурор ыстысьӧ Мӧскуа вылӧ; 4 мортӧс тшӧктӧ судитны лыйлыны.

Софияса собор взорвитӧм делӧ кузя суд вылын мыждысьыс (прокурор) аслас мыждана кыввисьтас (обвинительная речь) шуис: болгарияса коммунистъяс пӧ нуӧдісны став гуся уджсӧ Мӧскуасянь индалӧм да тшӧктӧм серти.

Прокурор тшӧктӧ судитны лыйлыны: Фридманӧс, Загорскӧйӧс, Коевӧс да Доскаловӧс. Кӧкъямыс во кежлӧ тюрмаӧ сюйны Гамбуровӧс.

Судтӧг виӧмаӧсь уна сюрс мортӧс.

Болгарияса правительство гижӧдъяс серти, некутшӧм судтӧг лыйлӧмаӧсь нин уна сё мортӧс правительстволы паныд мунысь пӧвстысь. На пиын уна газетъясӧ, журналъясӧ гижысьяс, докторъяс, инженеръяс, адвокатъяс, военнӧйяс, велӧдысьяс, велӧдчысьяс (студентъяс). Лыйлӧмаӧсь став рабочӧйяс пӧвстын удж нуӧдысьяссӧ, рабочӧй организацияясысь секретаръяссӧ, крестьяна газетаясысь редакторъясӧс, депутатъясӧс крестьянаяслысь, водзмӧстчысь крестьянаӧс да уна мукӧдӧс.