СОФИЯСА СОБОР ВЗОРВИТӦМЫСЬ СУД

Суд вылӧ йӧзӧс оз лэдзны.

ВЕНА. Май 1-ӧд лунӧ Софияса (Болгарияын столичаыс) военнӧй судын заводитчис суд Софияса собор взорвитӧмысь правительствоӧн мыждӧмъяс йӧз вылын. Суд вылӧ вайисны мыждӧмъясӧс: Фридманӧс, Задгорскӧйӧс, Коевӧс, Дасналовӧс да Камбусовӧс. Ставныслысь налысь кинысӧ и, кокнысӧ и дорӧмаӧсь кӧрт чепъясӧн. Мукӧд мыждӧм йӧз письыс (Петрини, Димитров, Абаджиев, Косовскӧй, Гренчаров) суд лыддьӧ ӧткымынсӧ пышйӧмӧн, ӧткымынсӧ виӧмӧн. Вичкоса служитысьыс Задгорскӧй суд вылын висьталӧ: меным пӧ соборсӧ взорвитны отсавны кӧсйысьӧмысь сетісны 12 сюрс лев (5000 шайт гӧгӧр). Задгорскӧйлы Абаджиев быттьӧкӧ пӧ шулӧма: собор взорвитӧм бӧрти пӧ лӧсьӧдӧма кыпӧдны нёль сюрс коммунистъясӧс оружйӧясӧн. Суд шуис делӧсӧ водзӧ нуӧдны ӧдзӧс тупкӧмӧн (йӧзӧс лэдзтӧг), медым вермас «бурджыка» юасьны мыждӧмъяслысь: отсалісны-ӧ налы собор взорвитӧм уджын мукӧд государствояс. Болгарияса правительствоыс ӧнӧдз медъёна собор взорвитӧмысь мыжавліс Минковӧс. Минковсӧ собор взорвитігас вилісны. Ӧні правительствоыс шуӧ — Минков пӧ некутшӧм удж собор взорвитӧм кузя эз нуӧдлы.

Юасисны свидетельяслысь. Свидетель Лебатов висьталіс: коммунистъяс да крестьяна союзысь шленъяс пӧ кӧсйисны вины Болгарияса сарӧс. Найӧ пӧ неважӧн на локтісны Югославиясянь. Мӧд свидетель Стончиков висьталіс: сёрнияс серти пӧ, кӧсйӧны вӧлі взорвитны Болгарияса парламентлысь керкасӧ.