МАТЫСМӦ МЕДБӦРЪЯ СРОК

Коми обласьт кузя видз-му вот (сельхозналог) мынтан медбӧръя срок юнь 1-ӧд лунӧ. Сэтчӧдз пӧра коли этша нин, а вот уналӧн на мынтытӧм. Колӧ коми крестьяналы мӧвпыштны: вот гижӧд (окладнӧй лист) сетӧмсянь медбӧръя срокӧдзыс костыс вӧлі 7 тӧлысьысь унджык, кокньыда позис мынтыны воттӧ. Кодлӧн абу на ӧнӧдз мынтӧма, колӧ зільны медбӧръя срок кежлӧ мынтыны ставсӧ, мед эз вӧв мынтысьтӧм ӧти морт, мынтысьтӧг кольччыны зэв абу лӧсьыд. Коми крестьянинлы унаысь нин висьтавлісны, вот мынтысьтӧмӧн сійӧ уна омӧль вӧчӧ аслыс да государстволы.

Колӧ шуны, эмӧсь на уна йӧз, кодъяс вермӧны да нарошнӧ оз мынтыны вотсӧ, сэтшӧмъяслысь колӧ перйыны мырдӧн. Сэсся эмӧсь гӧль улӧ лэччысьӧмаӧсь да, бара жӧ оз мынтыны, надейтчӧны: менсьым пӧ срок кольӧм бӧрас оз нин кутны корны мӧд воӧдз, сэсся пӧ вунӧдасны либӧ мездасны. Исполкомъяслы сэтшӧм йӧз вылас колӧ видзӧдлывлыныджык. Вот перйыны сэтшӧмъяслысь колӧ мырдӧн. Мукӧддырйиыс исполкомъяс асьныс ёна мыжаӧсь: найӧ омӧля видзӧдӧны вот мынтытӧм йӧз бӧрсяыс.

Кутам надейтчыны, коми крестьяна асьнысӧ оз янӧдны, ставныс воттӧ мынтасны срокӧдз.

Дзимбыр.