ВИДЗӦЙ ВӦРЪЯС СОТЧӦМЫСЬ!

Тулыссянь, муртса на удитас косьмыштны му, дзик арӧдзыс миян Коми обласьт пасьтала мӧдӧдчас тшынасьны-сотчыны вӧр.

Быд во сідзи. Быд во ми асьным сотам уна сюрс шайт дон эмбурнымӧс — ассьыным дай асланым государстволысь. Коми йӧзлы вӧрыд медыджыд доход вайӧ. Кымын сюрс морт вӧр помысь кынӧмпӧт перйӧ! Вӧр лэдзӧм помысь Коми обласьтлы воӧ вель ыджыд доход, ёна вынсьӧдӧ миянлысь бюджетнымӧс. Кыйсьысьяслы (вӧралысьяслы) вӧрыд дзик тыра йӧртӧд кодь: пӧткаыд и зверыд сэні. Сэсся вӧрыд видзӧ юястӧ чинӧмысь, косьмӧмысь. Шуны кӧ, вӧрыд — коми йӧзлӧн став озырлуныс. Кымын уна кутам бырӧдны-сотны вӧрнымӧс, сымын ёна кутас чинны миян озырлунным, бырны эмбурным. Сотчӧм вӧрыд — пуста керка. Некод сэні оз ов, некод сэтчӧ оз пыр.

Со кутшӧмтор миянлы вӧрыд. Колӧ сійӧс видзны-дӧзьӧритны быдӧнлы ассьыд кӧлуйӧс моз. Сӧветса правительство ёна тӧждысьӧ та йылысь, медым эськӧ видзчысьны вӧръяс сотчӧмысь. 1922ʼ воын на ещӧ лэдзліс закон: вӧр пӧжаръяс дырйи мырдӧн вӧтлыны йӧзӧс, вӧвъяснаныс тшӧтш, кусӧдчыны (трудгужповинность). Неважӧн (март 16-ӧд лунӧ таво) Ставрочмувывса Исполнительнӧй Комитет шуис: вӧр пӧжаръяс кусӧдны мырдӧн ыстыны йӧзӧс вермӧны Сельсӧветъяс, пӧжарыс кӧ 10 верст сайысь ылынджык уездувса либӧ обласьтувса карсянь.

Быдӧн нин тӧдӧны мырдӧннад уджалӧмтӧ. Оз ков сы выйӧдз воштысьны. Колӧ видзчысьӧмӧн вӧръясын биӧн вӧдитчыны, оз ков биа чигарка помъяс косінӧ шыблавны, торъя нин колӧ челядьӧс ӧлӧдны вӧръясын биасьӧмысь.

Коми войтыр! Видзӧй-дӧзьӧритӧй Коми мулысь озырлунсӧ!