НЮР КОСЬТАН ТӦВАРИЩЕСТВОЯС ЙЫЛЫСЬ

Турун скӧтӧс видзӧм вылӧ оз тырмы.

Миян Коми обласьтын нянь воӧм ставыс муӧс куйӧдалӧм сайын. Муяс вынсьӧдӧны да бурмӧдӧны сӧмын куйӧдӧн. Куйӧд кындзи сэсся нинӧмӧн миян муяссӧ оз вынсьӧдны.

Мед лоӧ тырмымӧн куйӧд му вылӧ — колӧ видзны тырмымӧн скӧт. Скӧт видзӧм — турун сайын. Турун кӧдзӧм миян Обласьтын пӧшти ньӧти на абу, скӧт видзӧны видзьяс вылысь пуктан турунӧн.

Крестьяналӧн миян Обласьтын видзьяс этшаӧсь, турун оз тырмы скӧт видзны тырмымӧн муяс куйӧдалӧм вылӧ. Бур местаяс видз паськӧдны сиктъяс да грездъяс матігӧгӧрын абуӧсь.

Нюръясысь вӧчны видз.

Сиктъяс да грездъяс дорын матын уна эмӧсь нюръяс. Крестьяна шуӧны некытчӧ шогмытӧмӧн сэтшӧм местаяссӧ да видз-муӧн паськӧдчыны мунӧны ылӧ бокӧ. Вӧлӧмкӧ, татшӧм местаясыд абу некытчӧ шогмытӧмӧсь. Позьӧ вӧлӧм татшӧм местаяссьыд вӧчны видз дай му.

Нюр косьтан тӧварищество йылысь.

Сӧмын колӧ ӧтувтчыны крестьяналы сиктын да заводитчыны сэтшӧм нюръяссӧ косьтыны. Вӧчны нюр местаӧ дыр кежлӧ бур видз дай му. Ӧтик либӧ кык крестьянин татшӧм нюръяс косьтыны оз вермыны. Колӧ ӧтувтчыны тайӧ уджсӧ нуӧдӧм вылӧ сиктысь став йӧзыслы либӧ, нюрыс кӧ ыджыд, ӧтувтчыны уна сиктлы нюр косьтан тӧвариществоясӧ. Татшӧм тӧвариществояслы Сӧвет власьт удждысян банкъяс пыр удждӧ сьӧм. Уджнас сьӧмыс сетсьӧ дыр кежлӧ — вит воӧдз.

Нюрысь косьтӧм да вӧчӧминъяс, нюр косьтан тӧварищество кӧ сійӧс вӧдитӧ агрономъяс велӧдӧм серти, переделъяс дырйи, вештасигӧн оз юксьы, а кольӧ нюр косьтан тӧвариществоса шленъяслы.

Нюръяс да эновтӧм местаяс кӧ сиктъяс да грездъяс гӧгӧрын матын вӧрын, косьтыны заводиттӧдз тӧвариществоӧ ӧтувтчӧм бӧрти колӧ пырысь-пыр жӧ корны сійӧ местасӧ видз-му удж нуӧданінъяслысь. Вундӧм бӧрти вӧлисти заводитны косьтыны, корны нюр косьтысьӧс да (гидротехника).

Ӧтувтчалӧй нюр косьтан тӧвариществоясӧ.

Коми крестьяна, тэрмасьӧй муяс куйӧдӧн вынсьӧдны, овмӧстӧ бурмӧдны! Ӧтувтчалӧй нюр косьтан тӧвариществоясӧ, заводиталӧй нюръяс косьтавны. Ті асьныд тӧданныд — тіян костысь унджыкыс быд во ветлывлӧны бокысь удж да нажӧтка корсьны. Мунӧны сюрс-сё верст сайӧ.

Вӧчӧ горт дораныд уджсӧ да нажӧткасӧ — матыс нюръяс косьтӧмӧн.

Кыдзи лӧсьӧдны нюр косьтан тӧвариществояссӧ да уставсӧ, туйдӧдсӧ позьӧ судзӧдны обласьтувса либӧ уездувса видз-му удж нуӧданінысь.

Куклин.