ГАЗЕТӦ ГИЖЫСЬЯСЛЫ

«Газетлы отсасян» кружок.

Ми гижлім нин «Газетлы отсасян» кружокъяс восьталӧм йылысь. Гижлім — кодлы позьӧ пырны сэтшӧм кружокъясас, кодлы колӧ сиктын босьтчыны тайӧ уджсӧ нуӧдӧм вылӧ. Дерт, медвойдӧр колӧ босьтчыны аслыныс газетӧ гижысьяслы кружокъяс восьталӧм удж вылӧ. Сэсся чорыда кутчысьны тайӧ удж вылӧ колӧ коммунист партия ячейкаяслы, комсомолечьяслы, профсоюзъяслы.

Мый вӧчӧны «Газетлы отсасян» кружокъяс.

Медвойдӧр кружокӧ пырӧм шленъяс асьныс велӧдчӧны бурджыка лыддявны газетъяс, журналъяс. Сы вӧсна лыддялӧны найӧ кружокын газетъяссӧ, журналъяссӧ артельясӧн, сёрниталӧны лыддьӧм йывсьыс.

Кружокъяс асьныс лэдзӧны стенӧ ӧшӧдан газет. Тайӧ газет пырыс кружокса шленъяс велӧдчӧны гижны гырысь газетъясӧ, петкӧдлӧны йӧзлы ассьыныс уджсӧ. Крестьяна стенӧ ӧшӧдан газет лыддьӧм вӧсна вочасӧн зільны кутасны судзӧдавны да лыддявны гырысь газетъяс.

Сэсся кружокъяс вӧчлывлӧны (кымын тшӧкыда, сымын лӧсьыд) крестьянаяслы газет лыддьӧмъяс. Тайӧ лыддьӧмъясыс оз ковны лоны куш лыддьӧмъясӧн. Крестьяналы газет лыддьӧмӧн кружокса шленъяслы колӧ зільны, медым крестьяниныс кутіс радейтны газетсӧ, мед ачыс велалас лыддявны дай гӧгӧрвоны сійӧс.

Сэсся ыджыд жӧ мог кружокъяслӧн зільны унджык газет сюйны крестьяна пӧвстӧ. Тайӧ уджсӧ кружокъяс вермасны нуӧдны крестьяналы газетъяс лыддигӧн, газетъяслысь колан да бурлунсӧ висьтавлӧмӧн.

Со кутшӧм уджъяс колӧ восьтӧм мысти нуӧдны «Газетлы отсасян» кружокъяслы.

Дерт, медбур кружокъяслы став уджсӧ нуӧдны лыддьысян керкаясын.

Газетӧ гижысьяс, партия да комсомол ячейкаяс, босьтчылӧй зільджыка восьтавны «Газетлы отсасян» кружокъяс, юӧртӧй «Коми Сикт» газетӧ, кымын шлен пырис кружокӧ, мый уджавны босьтчинныд.

Ноко, коді медвойдӧр? Ми виччысям.