МАЙ 1-Й ЛУН — СТАВМУВЫВСА РЕВОЛЮЦИОНЕРЪЯСЛЫ (МОПР-лы) ОТСАСЯН ЛУН

Талунъя луныс — ставмувывса уджалысьяслӧн ӧтувтчан лун. Талун ставмувывса уджалысь йӧз ӧти сьӧлӧмӧн петкӧдласны ассьыныс выннысӧ капиталистъяслы.

Му пасьтала капиталистъяс кыдз-мый вермӧны пӧдтӧны уджалысь йӧзӧс, медбур йӧзсӧ, кодъяс медъёна, повтӧг вермасьӧны озыръяскӧд.

Из сьӧлӧма, вир юысь капиталистъяс пыр ӧтарӧ ӧддзӧны революционеръясӧс бырӧдны. Тюрмаясын, катаргаясын сісьтӧны, виӧны, лыйлӧны, овмӧсъяссӧ рӧзӧриталӧны. Налысь мучитчӧмсӧ капиталистъяс видзӧдӧны нимкодь сьӧлӧмӧн.

Сё сюрсысь унджык рабочӧйяс сісьмӧны-кулӧны тюрмаясын, лыдыс лунысь лунӧ содӧ, помыс оз на тыдав.

Медбӧръя лёк уджсӧ Болгарияса правительстволысь он вермы весиг думӧн думыштны. София карса собор взорвитӧм бӧрын сэні судтӧг лыйлісны сюрс мыжтӧм мортӧс, уна сюрсӧс шыбитісны сісьмыны тюрмаясӧ.

Быд капиталист государствоын тадзи. Быдлаын уджалысь йӧзлӧн киссьӧ вир, быдлаын найӧ пӧдӧны.

Ыджыд тувсов праздник лунсӧ — Май 1-й лунӧ, ставмувывса рабочӧйяслӧн ӧтувтчан лунсӧ, — найӧ оз вермыны тшӧтш празднуйтныс. Налӧн сьӧлӧмыс сӧмын кутас тӧдны тайӧ ыджыд лунсӧ. Найӧ кутасны надейтчыны, шуны, мӧвпавны: «Талун праздник, талун быдлаын уджалысь йӧз петӧны ывлаӧ петкӧдлыны выннысӧ, ассьыныс ӧтувъя вермасьӧмнысӧ-косясьӧмнысӧ, миян сӧмын на вылӧ надеяным, ёртъяс миянӧс талун оз вунӧдны».

Налысь гӧлӧснысӧ-мӧвпнысӧ кыласны став му пасьтала.

Кылам тшӧтш и ми, ылын олысь коми войтыр.

Ми — мездысьӧм йӧз. Миянлы медвойдӧр, медъёна отсавны налы колӧ.

Отсӧг сетӧмыс — налы сьӧлӧм сетӧм. Кымын ёнджыка отсалам — сымын налысь сьӧлӧмсӧ кыпӧдам, сымын ставмувывса уджалысь йӧзлы мездысьӧм матыстам.

Коми войтыр! Коді мыйӧн верманныд, отсалӧй гӧль йӧз вӧсна мучитчысьяслы! Медым и миянсянь налы воыштас мыйкӧ мында отсӧг!

МОПР-са ячейкаяс! Паськӧдӧй, кыпӧдӧй ассьыныд уджнытӧ, медым отсӧгыс чукӧрмис сёысь унджык, мыйта вӧлі миянсянь ӧнӧдз!