ЁНМӦДАМӦЙ КРЕСТЬЯНАЛЫСЬ РАБОЧӦЙЯСКӦД ӦТУВТЧӦМ!

Май 1-ӧд лун... Талун став му вылын рабочӧйяс чукӧртчасны, петасны ывла вылӧ петкӧдлыны ассьыныс выннысӧ. Талун рабочӧйяс видзӧдласны, ёнӧсь-ӧ найӧ косясьны капиталистъяскӧд. Талун уджалысь йӧз став му пасьтала ыстасны мӧда-мӧдныслы ыджыд чолӧм.

Капиталист государствоясын уна рабочӧй талун веськалӧны тюрмаӧ асланыс повтӧм сьӧлӧмнаныс капиталистъяслы паныд мунӧмла. Он тӧд, уна-уна вир, мыжтӧм вир киссяс талун. Капиталистъясыд ӧд велалӧмаӧсь нин рабочӧйяслысь виртӧ юны! Налӧн киныс оз дрӧгнит пулемётъясысь резны рабочӧйясӧс.

Миян Сӧвет Республикаясын рабочӧйяс талун тшӧтш колльӧдӧны сьӧлӧмсянь Май 1‐ӧд лун. Миян Сӧвет Республикаясын рабочӧйясӧс некод оз кут праздник колльӧдӧмысь. Миян рабочӧйяс талун капиталистъяс юр вомӧн нюжӧдасны кинысӧ ставмувывса уджалысь йӧзлы, сетасны налы сьӧлӧм водзӧ кежлӧ капиталистъяскӧд вермасьны. Рабочӧйяс шуасны ещӧ на чорыда удж бердӧ кутчысьны Сӧветъяс Союзлысь овмӧссӧ кыпӧдӧм вылӧ, ещӧ на чорыда ӧтувтчасны крестьянакӧд.

Май 1-ӧд лун — рабочӧйяслӧн праздник, капиталистъяскӧд косясян праздник.

Колӧ-ӧ крестьяналы, аслас киӧн нянь перйысь крестьяналы, лыддьыны праздникӧн Май 1-ӧд лун? Дерт, колӧ. Крестьянин ӧд тшӧтш вермасьліс дай вермасьӧ ставмувывса капиталистъяскӧд.

Уджалысь крестьянин вермасьӧ аслас сиктса буржуйяскӧд (кулакъяскӧд). Миян Сӧветъяс Союзын сиктъясын уна на эм кулакыд. Найӧс гӧль да шӧркоддьӧма олысь крестьяна эз на вермыны. Уналаын на весиг ӧні гӧль да шӧркоддьӧм крестьяна вылын ыджыдалӧны кулакъяс.

Май 1-ӧд лун сиктъясын колӧ лоны уджалысь крестьяналы кулакъяскӧд вермасян праздникӧн.

Тайӧ лунӧ колӧ видзӧдлыны сиктъясын ассьыным выннымӧс, колӧ тӧдмавны, уна-ӧ сиктын буржуйыс, миянлы паныд мунысьыс. Колӧ тӧдмавны, уна-ӧ сиктын гӧль да шӧркоддьӧма олысь крестьянаяслӧн ӧтувтчӧмъяс: тӧвариществояс, комитетъяс, кооперативъяс. Миян ӧд кулакъяскӧд вермасьны медбур, медкокни ӧтувтчӧмъясын, ӧтувтчӧмъясӧн кулаклысь быдлаӧ нюжӧдчан кисӧ дженьмӧдны, мырддьыны сылысь нажӧтка (нажӧтка вузасьӧмӧн, йӧзӧс ылӧдчӧмӧн, уджӧдӧмӧн, сідз водзӧ). Мыйта пырӧмаӧсь крестьяна шленъясӧн сэтшӧм ӧтувтчӧмъясас? Колӧ корсьны туй, кыдзи став уджалысь крестьянасӧ сиктысь кыскыны ӧтувтчӧмъясас. Колӧ водзӧ кежлӧ корсьны бурджык ногӧн кулакъяскӧд вермасьӧм.

Мед олас Май 1-ӧд лун — Уджлӧн капиталкӧд вермасян праздник!

Мед бырӧны сиктъясын крестьянаӧс ас вылас уджӧдысь кулакъяс!

Мед паськалас крестьяналӧн тӧвариществоясӧ ӧтувтчӧмъяс!

Мед ёнмас крестьяналӧн рабочӧйяскӧд ӧтувтчӧм!