КУТШӦМ КОКНЬӦД СЕТӦ СӦВЕТ ВЛАСЬТ ИНВАЛИД ЧЕЛЯДЬЯСӦС ВЕЛӦДӦМЫН

Батьтӧм-мамтӧм челядьӧс видзанінӧ (детдом) война вылын кулысьяслысь, инвалидъяслысь босьтӧны мукӧд челядь дорысь регыдджык. Посни челядьӧс велӧданінӧ (детсад), ичӧт школаясӧ босьтӧны медвойдӧр жӧ налысь челядьсӧ.

Гырысьджык школаясӧ: ІІ-ӧд ступеньӧ, мастерскӧй школаясӧ (профшкола), техникумъясӧ сідзжӧ шуӧма инвалид да война вылын усьысьлысь челядьӧс водзджык босьтны. Шуам: профшколаын эм 10 места крестьяналы, сійӧ 10 местаас локтӧма 20 морт ӧткодя велӧдчӧм йӧз. На пиысь войдӧр босьтасны инвалид челядьӧс.

Медгырысь школаясӧ (ВУЗ) локтан во кежлӧ крестьяналы 15% став местасьыс. Сійӧ местасӧ тыртны (ыстыны велӧдчысьяссӧ) сетасны Исполкомъяслы. Таысь кындзи партийнӧй инвалидӧс вермас ыстыны партиялӧн комитетыс, комсомолечӧс — комсомоллӧн комитетыс; профсоюзын кӧ инвалид шленын — союзыс вермас ыстыны.

Гырысьджык школаясӧ пыригӧн инвалид челядьлы колӧ гижӧд босьтны Исполкомысь либӧ Вермытӧмлы отсасян юкӧдысь.

Велӧдчигӧн бара сетӧны инвалид челядьлы кокньӧд. Ӧні карса школаясын босьтӧны велӧдӧмсьыс дон. Сӧвет власьтлӧн закон шуӧма кодсюрӧӧс (гӧльджык велӧдчысьясӧс) дон босьтӧмысь мездыны. Сэтшӧм кокньӧдсӧ индӧма и инвалид челядьяслы. Велӧдӧмысь дон налысь оз позь босьтны. Сійӧ кӧть кутшӧм школаын — ыджыдын-ӧ (ВУЗ), ичӧтын-ӧ — ӧткодь.

Вермытӧм йӧзлы гырысь школаясын велӧдчигӧн сетӧны отсӧг (стипендия). Мукӧдлы серти инвалид челядьлы стипендия сетӧны регыдджык, дерт, зіля кӧ сійӧ велӧдчӧ.

Гижан кӧлуйяс, нигаяс этша судзсяна дырйи инвалид челядьлы школаын сетӧны дон босьттӧг.

Тайӧ сӧмын гырысьджык пӧлӧс кокньӧдъяс велӧдчӧмысь, эмӧсь ещӧ велӧдчӧмын и мукӧд пӧлӧс отсӧгъяс.

Война вылын усьӧм мортлысь, доймӧмлысь, ранитчӧмлысь челядьнысӧ Сӧвет власьт оз эновт, зільӧ найӧс велӧдны, кокньӧдӧ велӧдчӧмын.

С.