ЗӦВСЬӦРТЫН ОЛӦМ

Олӧны омӧля. — Кооперативӧ оз пырны. — Удждысян да видз-му бурмӧдан тӧвариществояс уджалӧны неуна бурджыка.

ЗӦВСЬӦРТ ВӦЛӦСЬТСА (Емдін у.) олӧны зэв омӧля. Кыз крестьянаыслӧн няньыс тырмӧ сӧмын 3−4 тӧлысь кежлӧ. Таво крестьяналы медся нин сьӧкыд овны. Няньыс воис зэв этша, нажӧткаяс омӧльӧсь. Мый вермисны, босьтісны кер лэдзӧмысь, груз кыскалӧмысь да ещӧ мукӧдыс ветлісны заводъясӧ. Прӧмыс Зӧвсьӧртын ньӧти оз кыйны.

Зӧвсьӧрт вӧлӧсьтын эм кык кооператив. Ӧтикыс Межӧгын, мӧдыс Зӧвсьӧртас. Межӧгса кооперативыс уджалӧ нинӧм на, Зӧвсьӧртсаыс дзик нин слаб. Йӧзыс кооперативас ньӧти оз пырны, воддза правленньӧыс абу уна судзсьылӧма да, полӧны. Став шленыс 37. На пиысь став членскӧй взноссӧ мынтӧма сӧмын 17 мортлӧн. Сэсся эм удждысян да видз-му бурмӧдан тӧвариществояс. Сэтӧні уджыс мунӧ неуна бурджыка. Йӧзыс видзӧдӧны тайӧ тӧвариществояс вылӧ бура.

РЕДАКЦИЯСЯНЬ: Миян ногӧн кӧ, Зӧвсьӧртса крестьяналы пырны кооперативӧ ёна колӧ. Ещӧ нин ёна колӧ пырны, найӧ омӧля олӧны да. Кооператив пыр, ӧтувтчӧмӧн, верман унджык колан тӧвар судзӧдны, верман вочасӧн овмӧстӧ бурмӧдны. Важ правленньӧ кӧ уна эз судзсьыв, сы вылӧ нинӧм на видзӧдны. Крестьяна ӧд кооперативӧ асьныс бӧрйӧны удж нуӧдысьяссӧ. Колӧ бӧрйыны бур, веськыда уджалысьясӧс. Ноко, Зӧвсьӧртса крестьяна, сёрнитлӧ та йылысь ас костаныд, мӧвпыштӧ гӧгӧрбок лючки. Мый шуанныд сэсся, юӧртӧ миянлы. Ми ёна виччысям.