ОТ ВӦЛӦСЬТЫН

(Емдін уездын)

Уисполком да волисполком вӧчисны докладъяс асланыс удж йылысь: кер лэдзӧм йылысь да сӧвет удж нуӧдӧм йылысь.

Докладъяс бӧрын конференция шуис:

Йӧзӧс бурдӧдан удж

сувтӧдны бурджыка. От вӧлӧсьтын абуӧсь пельшӧрскӧй пунктъяс. Арын да тулысын няйт туй вӧсна крестьяна оз вермыны некутшӧм отсӧг корсьны висьӧмысь. Сы вӧсна колӧ содтыны пельшӧрскӧй пунктъяс.

Йӧзӧс югдӧдан уджын

шуисны корны восьтыны школаяс Отйын, Попкерӧсын да Эжолтыын, сэсся содтыны ӧти велӧдысьӧн Ичӧт Кӧджмудорӧ да Туискерӧсӧ. Велӧдысьяслы унджык мынтыны дон.

Налогъяс

мед мынтасны бурджыка. Висьтавлыны водзӧ кежлӧ крестьяналы налог йылысь декретъяс, кыдзи да кодлысь босьтсьӧ налогыс, мед ставсӧ крестьянаыс гӧгӧрвоисны, асьныс кутісны отсавны налогсӧ чукӧртны, эз дзеблавны налог пуктанторъяссӧ.

Таво От вӧлӧсьтын омӧля зэв воис нянь. Сы вӧсна корны уездувса да обласьтувса удж нуӧданінъяслысь сетны От вӧлӧсьтсалы унджык кер кылӧдны, сы кындзи вӧлӧсьтас некутшӧм нажӧтка абу да.

Сӧвет удж нуӧдӧм йылысь

шуисны: чинтыны, кыдз позьӧ, уджалысьясӧс сӧвет удж нуӧданінъясысь. Ёнджыка уджавны йӧз бердын. Сы вӧсна корны, мед Уисполкомса да Обисполкомса шленъяс дырджык кежлӧ да тшӧкыдджыка волывлісны сиктъясӧ уджавны. Крестьяна собранньӧяс вылын удж нуӧданінъяслы вӧчавны докладъяс асланыс удж йывсьыс.

Волисполкомлысь да Уисполкомлысь уджсӧ крестьяна конференция шуис бурӧн.

Быдсикас кооперативъяс йылысь

доклад кывзӧм бӧрын конференция шуис: восьтавны ёнджыкасӧ сӧмын му-видз бурмӧдан тӧвариществояс. Зільны найӧӧс ӧтлаавны да тшӧктыны волисполкомлы туйдӧдавны сэні уджсӧ нуны. Корны Сельхозбанклысь уездса удж нуӧданінъяс пыр, мед гӧль крестьяналы содтасны сьӧм удждӧм вылӧ тӧвариществоясӧ.

Корны потребительскӧй общество правленньӧлысь восьтавны сиктъясӧ кооператив отделенньӧяс.

Видз-му лӧсьӧдӧм йылысь

доклад вӧчӧм бӧрын конференция шуис ӧнісянь жӧ заводитчыны нуӧдны видз-му лӧсьӧдан удж.

Став вӧлӧсьтыс ӧти земельнӧй обществоын да, сы вӧсна собранньӧяс вылӧ тырмымӧн йӧз некор оз чукӧрмыв. Сы вӧсна конференция корӧ быд дас морт пиысь бӧрйыны ӧти мортӧс да собранньӧяссӧ вӧчавны сійӧ бӧрйӧм йӧзыслы.

Озырджык крестьяна зільӧны падмӧдны гӧль крестьянаӧс видз-му лӧсьӧдан удж нуӧдӧмысь. Сы вӧсна конференция тшӧктӧ корны колян удж нуӧданінъяслысь, мед видз-му лӧсьӧдан уджсӧ вӧлӧсьтас нуӧдасны мырдӧн.