НЯНЬ КӦДЗӦМ ЙЫЛЫСЬ

Колӧ весавны кӧйдыс.

Медводз колӧ крестьянинлы тӧдны — лёк кӧйдысысь бур урожай оз во. Миян уна крестьяна на кӧйдыснысӧ оз весавны (сортируйтны). Весавны кӧйдыстӧ колӧ, медым кӧдза вылӧ мунӧ сьӧкыд, гырысь туся кӧйдыс. Кӧйдыс весалігӧн оз сӧмын коньӧр тусьыс шыбитсьы, торъялӧ тшӧтш турун ёг кӧйдыс.

Мый пыднаӧ колӧ кӧдзны.

Быд гӧрысьлы колӧ тӧдны — пыдӧ кӧдзӧмӧн тӧлк оз босьт: ӧти‐кӧ, сынӧдыс пыдӧ муӧ оз вермы пырны, мӧд‐кӧ, кӧйдысыд дыр оз чуж, мукӧдыс весиг оз и вермы мыччысьлынысӧ. Ляпкыда кӧдзӧм — бара жӧ абу бур.

Медся бур со мый пыднаӧ кӧдзны.

Сю .... ½−1½ вершӧк

Шабді .... ½−1½ „

Зӧр .... ½−1¾ „

Ид .... ½−1¾ „

Анькытш .... ¾−2 „

Кӧнтусь .... ½−1¼ „

Тшӧкыд да шоч кӧдза.

Тшӧкыд дай шоч кӧдза омӧль. Босьтам тшӧкыд кӧдзасӧ: быдтасъясыс пондасны вермасьны ёрта-ёртныскӧд югыд вӧсна, идзасныс налӧн быдмас зэв ӧдйӧ, сэсся нёрасны. Нёрӧм сюӧ бур нянь некор оз вермы артмыны. Кӧдзыд тулысын да сёр кӧдзаясӧс колӧ кӧдзны тшӧкыдджыка. Уналаын десятина вылӧ кӧдзсьӧ киӧн коялӧмӧн:

Сю .... 8−12 пуд

Шобді .... 10−12 „

Ид .... 12−20 „

Зӧр .... 9−16 „

Анькытш .... 9−12 „

Шабді кӧйдыс вылӧ .... 5 „

„ дӧра вылӧ .... 8−12 „

Дерт, бура чужан кӧйдыс позьӧ этшаджык кӧдзны, лёка чужан — унджык.

Медбур кӧдзны машинаӧн.

Медся бура артмӧ кӧдза вӧла радӧвӧй кӧдзан машинаӧн. Сійӧ кӧдзӧ ӧтпыднаӧ да кӧйдысъяс костсӧ вӧчӧ ӧткодя. Татшӧм кӧдзаыд тусьясӧс мӧда-мӧднысӧ оз тшыгӧмтыны, оз дзескӧдны, ставныслы тырмӧ югыд, сёян-юан. Машинаӧн кӧдзӧмӧн кӧйдысыд ковмас этшаджык.

Идтӧ пуд^?/^ пыдди позьӧ кӧдзны 10−12 пуд, сютӧ 10−12 пуд пыдди: 6−8 пуд. Медся нин ёна машинаӧн кӧдзӧм бур, кос воясӧ.

Крестьяналы колӧ ӧтувтчыны морт дас вит кымынлы да босьтны ӧнія висьталан машинасӧ.

Т. Подоров.