ВӦЛӦСЬТЪЯСЛӦН ОВМӦС (ХОЗЯЙСТВО)

Волисполкомъяслы сетавны став вӧлӧсьт вылӧ уджалысь предприяттьӧяс. — Сетны казнасянь отсӧг вӧлӧсьтса олӧм бурмӧдны. — Местнӧй содтӧд ставнас кольны вӧлӧсьтӧ. — Дугӧдны не закон серти вотъяс перйӧм. — Чинтыны штрапъяс да пеняяс.

Сӧвещанньӧ шуис: юнь 1-ӧд лун кежлӧ сетны вӧлӧсьтувса исполкомъяслы быдсяма пӧлӧс предприяттьӧяс, кодъяс вермӧны вайны доход да уджалӧны сӧмын вӧлӧсьт вылӧ. Сӧвещанньӧ шуис сідзжӧ отсавны вӧлӧсьтъяслы казнасянь: сӧветъясын уджалысьяслы мынтысьӧм вылӧ, школаяс, бурдӧдчанінъяс да агрономъяс видзӧм вылӧ, туй вӧчӧм вылӧ. Татшӧм отсӧгсӧ позяс видзны сӧмын кытчӧ шуӧма сьӧмсӧ сетігас. Вӧлӧсьтъяслӧн асланыс колӧ содтысьны велӧдчан да овмӧс кутан рӧскодъяс вылӧ да сы пыдди чинтысьны мукӧд вӧлӧсьтса рӧскодъясысь.

Вотъяс дінӧ (сельхозналог дінӧ) местнӧй содтӧд ставнас колӧ сетны вӧлӧсьтъяслы. Колӧ сэсся лӧсьӧдны законӧн, уна-ӧ вӧлӧсьтӧ сетны мукӧд доходъясысь (вӧрысь, предприяттьӧясысь, с. в.). Сетӧма кӧ лоӧ сэтшӧм доходъяссӧ да тшӧтш вӧлӧсьт вылӧ уджалысь предприяттьӧяс, сэк вӧлӧсьтлӧн бюджет (доход-рӧскод) став Союз кузяыс содас войдӧрся 147 миллион шайтсянь 250−300 миллион шайтӧдз.

Сӧвещанньӧ шуис корны Центральнӧй Исполкомлысь дугӧдны йӧзлысь не закон серти вотъяс перйӧм да местнӧй штрапъяс да пеняяс чинтӧм йылысь.