ВЕЖОНЧӦЖСЯ ВӦВЛӦМТОРЪЯС
ФРАНЦИЯЫН.
Выль правительство.
Эррио правительство отставкаӧ петӧм бӧрын квайт лун мысти лӧсьӧдісны выль правительство. Выль правительствоӧ пырисны Пенлеве, Бриан да мукӧд. Пенлевеӧс пуктісны премьер-министрӧ (юралысьӧ).
Пенлеве дінӧ волӧмаӧсь социалистъяссянь делегацияяс юасьны, кыдзи кӧсйӧ выль правительство нуӧдны уджсӧ. Сёрни бӧрын социалистъяс шуӧны Пенлевекӧд ӧти кывйӧ воӧмӧн.
ПОРТУГАЛИЯЫН.
Заводитлӧмаӧсь власьт мырддьыны.
Лиссабон карын, апрель 18 лунӧ, генералъяс да офицеръяс кӧсйылӧмаӧсь босьтны ас кианыс власьт. Кыптылӧма кось. Ранитӧмаӧсь 100 морт гӧгӧр, виӧмаӧсь 13-ӧс.
ЯПОНИЯЫН.
Пуктӧмаӧсь посолӧс.
Япониясянь Мӧскуаӧ локтас посолӧн Йошизава. Ӧнӧдз сійӧ вӧлі посолын Китайын. Йошизава ёна отсаліс СССР да Япония кост лӧсьӧдчыны. Ӧні сійӧ висьӧ, сы понда нюжалӧ тӧргуйтны лӧсьӧдчан удж. Чайтӧны, мыйӧн бурдас, регыд жӧ чукӧртчас конференция — водзӧ СССР да Япония кост олӧм йылысь да тӧргуйтӧм йылысь сёрнитны.
ГЕРМАНИЯЫН.
Президент места век на куш.
Партияяс костын зыксьӧм понда век на эз вермыны бӧрйыны выль президентӧс. Быд партиялы колӧ пуктыны мортӧс ас партиясьыс. Социал-демократъяс да Центр. партия зільӧны Марксӧс пуктӧм понда, коммунистъяс — Тельманӧс, буржуйяс — Гинденбургӧс. Гинденбург — зэв сюсь генерал. Колян ыджыд войнаяс дырйи став немеч войскаяснас командуйтліс. Вӧлі веськыд ки пыдди Вильгельм корольлӧн. Вильгельмӧс шыбитӧм бӧрас да Германияысь вӧтлӧм бӧрас кыдз-мый вермӧ мырсьӧ сы дор. Коммунистъяс шуӧны, татшӧм олӧмӧдз пӧ германияса йӧзӧс вайисны важ президент Эберт да меньшевикъяс, сӧмын пӧ чорыда буржуйяскӧд вермасьӧмӧн, тышӧн-косьӧн рабочӧйяс вермасны мездысьны капиталистъяс кабыр улысь.
БЕЛЬГИЯЫН.
Выль правительство.
Выль правительство тшӧктӧма лӧсьӧдны меньшевик Вандервельделы. Вандервельде нуӧдӧ сёрни буржуй партияяскӧд ӧтвылысь министръясӧс пуктӧм йылысь да ӧтвылысь уджалӧм йылысь. Либералъяс ас костсьыныс министръясӧс пуктӧмысь ӧткажитчӧмаӧсь.
БОЛГАРИЯЫН.
Неуна юрсӧ эз орӧдны.
Кыптӧны косьяс.
Болгарияса сар Борис вылӧ София карын шыбитлісны бомба. Свитасьыс виисны кык мортӧс, сарыс коли ловъя.
Мӧд лунас панапида сьылӧдны чукӧртчӧма соборӧ зэв уна начальство. Собортӧ сьылігкостіыд взорвитасны да виасны зэв уна йӧзӧс, министръясӧс да генералъясӧс.
Ӧні став Болгария пасьтаыс лӧсьӧдӧмаӧсь осаднӧй положенньӧ. Зэв нин уна йӧзӧс арестуйталӧмаӧсь. Уналаын кыпталӧны войскаяс кост да партизанъяс кост косьяс. Болгарияса правительство мыждӧ коммунистъясӧс. Некод оз тӧд, коді мыжаыс, а арестуйталӧны да лыйлӧны дзик мыжтӧм войтырӧс. Сербиясянь юӧртӧны 500 мортӧс нин лыйлӧм йылысь. Цанков (юралысьыс министръяс сӧветын) шуӧ — тані пӧ мыжа тшӧтш Сӧвет правительство. Чичерин ёрт (мукӧд государствокӧд волысян комиссариатын Народнӧй Комиссар) сетіс тайӧ шуӧмъяс вылӧ зэв чорыд вочакыв, шуӧ: Цанковлӧн пӧ висьталӧмыс ставыс ылӧг, сійӧ пӧ ачыс топӧдӧ Болгарияса йӧзӧс, сійӧ топӧдӧм вӧснаыс йӧзыс кыпӧдчӧны ёна. Цанков сэсся зільӧ мыжсӧ ас вывсьыс вештыны, воны Сӧвет правительство вылӧ. Мед бара шуас, ставмувывса йӧз оз эскыны сылы, аддзӧны — кӧні да кодсянь мыжыс.
Болгарияса рабочӧй да крестьяна асьныс шыбитасны ас сьылі вывсьыныс вир юысь Цанковӧс.
