ОТСАЛӦЙ ИНВАЛИДЪЯСЛЫ!

Мыйта сетіс отсӧг инвалидъяслы Обласьтувса комитет.

Быдлаын СССР кузя лӧсьӧдалӧма инвалидъяслы, висьысь да ранитчӧм гӧрдармеечьяслы, найӧ семьялы тшӧтш отсасян Комитетъяс. Сэтшӧм комитетыс эм и миян Коми обласьтын. Сӧмын сы йылысь унаӧн на миян обласьтын бурджыкасӧ оз тӧдны. Важӧн сійӧ Комитетыс вӧлі Вермытӧмъяслы отсасян юкӧд бердын. Со мыйӧн ӧнӧдз отсалӧма инвалидъяслы Обласьтувса инвалидъяслы отсасян Комитетыс: 1) ӧтувтчӧдӧма ӧтвылысь уджавны 226 инвалидӧс, 2) сетӧма мӧда-мӧдлы отсасян комитетъяс пыр кӧйдыс вылӧ инвалидъяслы 400 шайт (колян воӧ), 3) сетӧма посньыдик отсӧг да: Ленинградӧ кокла (протезла) мунысьяслы, 58 инвалидлы, колян во вылын, 909 шайт.

Комитетлӧн ас ордас коли сьӧмыс 7.713 шайт. Сы пиысь уджӧн сетӧма 7.130 шайт Обласьтувса Инвалидъяс ӧтувтчан правленньӧлы.

Кытысь чукӧрмыліс Комитетӧ сьӧмыс.

Тайӧ став деньгаыс чукӧрмыліс ӧктысьӧмӧн, спектак сувтӧдӧмъясысь, членскӧй взносъясысь, Гӧрд армиясянь инвалидъяслы отсасян комитетсянь дай мукӧдлаысь.

Колӧ отсавны инвалидъяслы быд уджалысь мортлы.

Инвалидъяслы отсасьӧм удж вылӧ ёна колӧ босьтчыны быд уджалысь мортлы. Инвалидъяс вылӧ колӧ бурджыка видзӧдлыны, оз ков вунӧдны — найӧ миянӧс капиталистъясысь видзӧмла ассьыныс дзоньвидзалунсӧ воштісны.

Государство оз на вермы налы сетны тырмымӧн отсӧг. Сы вӧсна миянлы колӧ ставнымлы ӧтвылысь, коді мыйӧн вермас, отсавны инвалидъяслы. Водзӧ кежлӧ миянлы колӧ ставнымлы пырны шленъясӧн инвалидъяслы отсасян комитетӧ. Сідзи ми вермам сетны тыр отсӧг инвалидъяслы, отсавны помала дугдывтӧг.

Инвалидъяслы отсасьӧм кузя тӧлысь.

25-ӧд апрель лунсянь 25-ӧд май лунӧдз Коми Обласьт кузя пондас мунны инвалидъяслы отсӧг сетӧм вӧсна тӧлысь. Быд уджалысь мортлы сійӧ тӧлысяс колӧ отсавны инвалидъяслы, коді мыйӧн вермас, колӧ пырны шленъясӧ инвалидъяслы отсасян комитетӧ. Обласьтувса инвалидъяслы отсасян комитет чуксалӧ быд уджалысь мортӧс отсавны инвалидъяслы.

Обкомпомса шлен Е. И.