ВИДЗЧЫСЯМӦ ПӦЖАРЪЯСЫСЬ
Пӧжарнӧй удж сиктъясын омӧль.
Миян редакцияӧ сиктъяссянь воӧны юӧръяс пӧжарнӧй удж сувтӧдӧм йылысь.
Унджык юӧр сертиыс ми аддзам — сиктъясын, вӧлӧсьтъясын омӧля на тӧждысьӧны пӧжаръясысь видзчысьӧмысь, омӧля на зільӧны лӧсьӧдавны пӧжар кусӧдан кӧлуйяс.
Уна волисполкомъяслӧн вӧчалӧма пӧжарнӧй сарайяс, ӧткымынлаын эмӧсь быдсикас пӧжар кусӧдан кӧлуйяс. Сӧмын видзӧнысӧ сэтшӧм кӧлуйяссӧ нелючки, кыдзисюрӧ. Лоӧ кӧ пӧжар, тэрмасигтырйиыд, бура дась лӧсьӧдтӧг кусӧдчан кӧлуйыс оз и шогмы. Сідз Паджгаын (Сыктыв уездын) вӧлӧма пӧжар да, кусӧдчан машинасӧ вайӧмаӧсь эськӧ да, рукавыс мӧд машиналӧн веськалӧма. Лоӧма ветлыны мӧдысь. Биыд, дерт, оз виччысь йӧзыдлысь тойтӧмсӧ, ассьыс уджсӧ горша вӧчӧ.
Водзӧ вылӧ тадзи кольччыны оз позь.
Водзӧ вылӧ пӧжарнӧй удж татшӧм омӧльӧн сиктъясын кольны оз позь. Ӧні воӧ гожӧм. Гожӧмын, кос поводдя дырйи, ещӧ нин ёна вермасны лоавны пӧжаръяс.
Колӧ миян ӧнісянь жӧ чорыда босьтчыны кусӧдчан удж бура лӧсьӧдны.
Кыдзи колӧ лӧсьӧдны кусӧдчан удж.
Медвойдӧр колӧ лӧсьӧдавны тырмымӧн кусӧдчан кӧлуй. Волисполкомъяслы асланыс бюджетысь колӧ тайӧ удж вылӧ тӧдчымӧнджык, тырмымӧнджык сетны сьӧм. Колӧ лӧсьӧдны быд вӧлӧсьтын пӧжарнӧй сарайяс. Лӧсьӧдавны сэтшӧм сарайяс, медым эськӧ сэні кусӧдчан кӧлуй эз тшыкны, медым эськӧ сарайсӧ тӧлын позьӧ вӧлі ломтыны. Сэсся колӧ кусӧдчан кӧлуйсӧ видзны пыр дасьӧн. Медым быд здук став сикас кӧлуйсӧ пырысьтӧм-пыр позьӧ вӧлі пӧжар вылӧ нуны.
Колӧны пӧжарнӧй дружинаяс.
Ещӧ нин ёна колӧ лӧсьӧдавны пӧжарнӧй дружинаяс. Миян пӧшти некутшӧм сиктын дружинаыд абу. Пӧжар лоӧм мысти йӧзыд ставныс уськӧдчасны кусӧдчыны. Коді мый вермӧ, кодлы мый сьӧлӧм вылас воӧ, сійӧ и вӧчӧ. Вӧчныс вӧчӧны, пӧсь петӧ уджалӧны, сӧмын бурыс этша. Дружинаяс кӧ лӧсьӧдалан, водзвыв кӧ дружинаас пырӧм йӧзлы юклан, кутшӧмджык удж быдӧнлы пӧжар вылын вӧчны, индалысьӧс кӧ пуктан, дерт, сэки кокньыдджыка, бурджыка кусӧдчӧмыд мунас. Дружиналы колӧ велӧдчыны кусӧдчыны. Сы вӧсна позьӧ вӧчавлыны манёвръяс.
Волисполкомъяс, босьтчылӧй тайӧ удж вылӧ ёнджыка.
Быд крестьяналы колӧ мӧвпыштны, шыбитны ассьыс модасӧ да шуӧмъяссӧ: «Гашкӧ, менам оз ло пӧжарыд!» Да зільны бура сувтӧдны кусӧдчан удж.
