МОРТ ВИӦМ

Обсудлӧн Сессияыс март 30-ӧд лунӧ судитіс Абъячойын морт виӧмысь Семен Васильевич Лобановӧс.

Со кыдзи лоӧма виӧмыс: колян воӧ (1924) январ квайтӧд лунӧ Лобанов Семен локтӧма мельничаӧ изӧдчыны, гажа юрӧн. Сэні йӧзыскӧд пыри пиньӧ воӧма. Пинясигас Лобанов Семен кучкӧма куим пунта гираӧн Иван Лобановӧс. Кыдзкӧ артельӧн найӧс торйӧдӧмаӧсь да Лобанов Сементӧ игналӧмаӧсь мельнича уліас. Ӧти здук мысти лӧмӧн ӧдзӧстӧ жугӧдӧма дай бара пыралӧма выліас корсьны Иван Лобановӧс. Лобанов Иваныд абу сюрӧма да, мунӧма аслас сиктас корсьны Лобановтӧ нӧйтны.

Пыралас сиктад ӧти-мӧд керкаӧ, да оз сюр.

Асъявылыс нин лӧмнад бӧр мунӧ мельничаад. Туй вылад паныдасяс сылы Иван Лобановыд, пызь вӧлӧм кыскӧ даддьӧн. Кыв ни джын оз шу, лӧмнад швачкӧбтас сылы пель бокас. Лобанов Иван сійӧ кучкӧмсьыс мӧд лунас жӧ и кулӧ.

Обсудлӧн Сессия 149 ст. 2 ч. Уголовнӧй Закон Чукӧр серти шуис: Лобанов Семенӧс пуксьӧдны вит во кежлӧ да куим во кежлӧ став правасӧ босьтны. Сэсся пемыдлун вӧснаыс да Гӧрд Армияын служитӧм вӧснаыс чинтіс сылы пукалӧмсӧ ӧти во, пукӧдны сӧмын — нёль во.

И.