ЛИСКАСЬӦНЫ

«Югыд туй» газетын, 67-ӧд номерын, Спаспорубса дякӧн Трубачёв гижӧма письмӧ. Чӧвтча пӧ дякӧнысь. Каитчӧ дякӧналӧмысь, «гӧгӧрвоӧма», йӧзӧс ылӧдлыны оз шогмы енлы эскӧмӧн. Шуӧ: видлалі пӧ гижӧдъяс Маркслысь, Энгельслысь дай тӧдмасьӧма ленинизмӧн. Со ӧд! Гӧгӧрвоан ӧд, зептыд кӧ пыркавны кутас да, йӧзыд пӧрйӧдлӧм вылад мӧд синмӧн кутасны видзӧдны. Дякӧн Трубачёвлы колӧ нин вӧлі гӧгӧрвоны войдӧр. Сійӧ ӧд вӧлі Политпросветын уджалысь. Медся сьӧкыд удж нуӧдан воясас пышйис аслас кынӧмыс понда (кокни нажӧтка вӧсна, чӧскыд сёян корсьӧмла) дякӧнавны. Ӧні мӧдарӧ сынӧ, лискасьӧ. Казяліс — поп-дяктӧ йӧзыд эз кутны радейтны! Зептыс личавны кутіс, кад нин пӧ бӧр сӧвет учрежденньӧӧ пырны. Ме ногӧн кӧ — кык бана шаньгасьыд дзик нинӧм.

Со мый колӧ тӧдны став уджалысь йӧзлы Трубачёв «гӧгӧрвоӧм» йылысь. Дякӧнсьыд чӧвтчыныд чӧвтчы, сӧмын нэм кежлад тэнад «пасыд» кольӧ.

Кыдъя нянь.