ЛӦЗЫМЫН

(Сыктыв уездын, Паджга вӧлӧсьтын)

Сельсӧветын юралысь (председатель) апрель 5-ӧд лунӧ вӧлі вошӧма и корсьны оз кужны кӧні. Вӧлӧмкӧ, сійӧ мунӧма Паджга исполкомса шленкӧд самӧкур юны да кодзӧмаӧсь. Буракӧ вунӧдӧма, мый сійӧ сельсӧветын председательын. Крестьяна тӧждысьӧны ёна землеустройство вӧсна, да нюр косьтӧм вӧсна, да кӧйдыс бурмӧдӧм вӧсна. Карса йӧзлысь та йылысь ёна юасисны общӧй собранньӧ вылын рытнас. Собранньӧ вылӧ ставыс воліс морт 40−50 гӧгӧр. Нюр косьтыны 12 крестьянин организуйтӧмаӧсь нин мелиоративнӧй тӧварищество. Землеустройство дырйи кӧсйӧны юксьыны Паджгаысь да бырӧдны сорті-кості (чересполосица) видз-муӧн пӧльзуйтчӧм. Вӧрын овмӧс нуӧдӧм понда сёрнитігӧн крестьяна шуӧны: мыйла пӧ сортовка нуӧм бӧрти коляс пу йывсӧ оз сетны крестьяналы, дон сы вылӧ босьттӧг, пес вылӧ вайны, либӧ леснӧй ведомствоыс пӧ ачыс оз чукӧрт сійӧ да карӧ пес вылӧ кылӧд, а места вылас сісьтӧ. Крестьяна Лӧзымын пондӧмаӧсь садьмыны, сӧмын сельсӧветын, буракӧ, юралысь абу бур, да сэсся союз молодежи, буракӧ, омӧля уджалӧ. Собранньӧ вылӧ волісны сӧмын союз молодежиысь шлен кык-куим. Лыддьысян керка омӧля жӧ, буракӧ, уджалӧ. Праздникъясӧ да кор йӧзыс прӧстӧсь лыддьысян керкаын колӧ ёна уджавны, а вӧскресенньӧӧ сійӧ вӧлі пуста, йӧзыс прӧста довъялӧны. Колӧ союз молодежилы бурджыка босьтчыны лыддьысян керкаын удж нуӧдны, а сельсӧветса председательӧс да волисполкомса шленӧс колӧ неуна пальӧдны, мед найӧ оз вунӧдны ассьыныс уджнысӧ.

К—С.