КОЛӦ КУТЧЫСЬНЫ КИНО БЕРДӦ

Йӧзӧс велӧдан уджын ёна ыджыд отсӧг сетӧ кино (миян деревняясын шуӧны «ловъя картинаӧн»). Оз весьшӧрӧ сёрнитны кино йылысь центральнӧй съездъяс вылын. Кыдзи нӧ тайӧ абу буртор! Видзӧдлӧ жӧ: занавес вылын тыдалӧ олӧм, олӧмыслӧн бурыс и лёкыс, гӧгӧрвосьӧ кокниджыка, видзӧдігӧн шойччан кад колян бура.

Вермам-ӧ ми мыйкӧ вӧчны кино лӧсьӧдӧмын, тырмас-ӧ сьӧм да кужӧм?.. Кулӧмдін уездувса Исполком судзӧдіс Главполитпросветысь киӧн уджалан аппарат 640 шайтысь (ӧні донтӧммӧма 10% вылӧ). Вайӧмыс сувтӧма 25 шайт. Кулӧмдін Нардомын петкӧдлісны ӧти картина. Позьӧ шуны, татшӧм киноаппаратыс лоӧ миян деревняӧ дзик буретш, картина артмӧ, позьӧ уджавны 7 да 15 метр сайсянь занавессяньыс. Абу сьӧкыд аппаратыс — позяс новлӧдлыны вӧлӧсьтысь вӧлӧсьтӧ. Уджавны сійӧн позьӧ велавны регыдӧн, Кулӧмдінса служащӧйяс, некод аддзывлытӧм йӧз, асьныс гӧгӧрвоӧмаӧсь машина гӧгӧр — косялӧны и тэчӧны. Сӧмын колӧ кыдзкӧ лӧсьӧдны бурджыка лента судзӧдӧм; та дінӧ, ми чайтам, кутчысяс Обласьтувса Уполномоченнӧй Пролеткинолӧн. Кино бердӧ кутчысьны позьӧ дай колӧ ӧнісянь жӧ, паськӧдны деревняясӧ. Прамӧя кӧ кутчысьны — мыйсюрӧ позьӧ вӧчны дзик ӧні, уездъяс аддзасны та мында сьӧмтӧ дзик жӧ пыр. Сэсся уна вӧлӧсьт вермас лӧсьӧдны аслыс — уналаын ӧд эм сьӧм волбюджетын, отсаласны кооперативъяс. Мыйкӧ мында киноыд рӧскодтӧ вештас йӧзыслысь дон босьтыштӧмӧн, петкӧдлігӧн. Уджавны велӧдчыны позьӧ избачлы либӧ мукӧд служащӧйлы.

Ещӧ колӧ кыв-мӧд шуны лента йылысь. Крестьяниныд бурсӧ да омӧльсӧ ёнджыка гӧгӧрвоас, кор сійӧ петкӧдчысьӧ тӧдсатор йылысь. Сідзкӧ колӧ панны сёрни коми овмӧс гӧгӧрысь лентаяс вӧчӧм йылысь.

Вайӧ жӧ бурджыка кутчысьламӧй кинояс лӧсьӧдавны.

Теров.