ӦТУВЪЯ УДЖ НУӦДӦМ
Косьтӧны нюр. — Воссис кооператив. — Вӧчӧны Нардом.
Паджга вӧлӧсьтын (Сыктыв уездын) крестьяна кост олӧмын тӧдчӧ ӧтласа уджалӧм му-видз бурмӧдӧм вылын да йӧзӧс югдӧдӧмын, ещӧ нин ёна сійӧ тӧдчӧ Гаръя сиктын. Гаръяса крестьяна туйдӧдӧмӧн колян во лӧсьӧдісны му-видз косьтан (
1924 воӧ декабрын, кооператив удж нуӧдан тӧлысьын, восьтісны кооператив. Кооперативыс уджаліс зэв бура; недыр да донтӧг вузасигӧн ӧнӧдз босьтіс нин сизимсё барыш. Сэки кымын жӧ гӧгӧрвоана том йӧзыс ӧтлаасисны да корисны ассьыныс шефсӧ (Административнӧй Отделӧс) восьтыны ячейка РЛКСМ. Ӧні ячейка эм нин, ёна уджалӧ йӧз югдӧдан да овмӧс кыпӧдан уджын. Ячейкаыс аслас выннас жӧ восьтіс лыддьысян керка, сӧмын ӧні шефыс вежсис да газетъяс эз кут воны. Крестьяна ӧні вӧчӧны нардом. Сэтчӧ кӧсйӧны ӧтлаавны сценасӧ и, лыддьысян керкасӧ и, сельсӧветсӧ и, кооперативсӧ и, кусӧдчан кӧлуй видзанін и.
Ӧні сетӧмаӧсь заявленньӧяс пырны коммунист партияӧ куим морт. Ӧтисӧ босьтісны нин, кыкыслысь заявленньӧсӧ эз на видлавны. Куимнан пырысьыс — гӧль крестьяна, куш му уджалӧм помысь олысьяс.
Восьтылісны видз-му уджалан машинаӧн тӧварищество; пыраліс сэтчӧ 16 морт. Госсельсклад куим тӧлысь мысти кутіс перйыны сьӧмсӧ машинаяссӧ босьтӧмысь. Крестьянаыс эз вермыны мынтынысӧ. Сы вӧсна уджыс тӧвариществоас бӧр кусі. Ноко, мый шуас татчӧ Госсельскладыс?
Ньӧжйӧник садьмӧдчӧны и Лӧзымын крестьяна, сӧмын сьӧкыда. Ёна на кутӧ найӧс самӧкур. Сэкитӧ, дерт, асьтӧ югдӧдан уджыд оз мун. Бурторйыд ичӧтика сиктад эм жӧ эськӧ. Организуйтӧма ячейка РЛКСМ; сэні кызь шлен. Оз кӧ найӧ самӧкурнас тшӧтш ылавны, налысь позяс виччысьны бур удж. Неважӧн лӧсьӧдісны му-видз косьтан тӧварищество. Уджсӧ нуӧдныс сӧмын заводитчӧ на. Кӧсйӧны косьтыны Лӧзым бокса нюрсӧ да став маті васӧдінсӧ.
