МЫЙ КОЛӦ ТӦДНЫ МӦСЪЯС ЙЫЛЫСЬ

Крестьянин, вӧч тайӧ гижӧд серти!

Скӧт видзны колӧ кужны. Коді бура дӧзьӧритӧ скӧтӧс — сылӧн шыльыда мунӧ овмӧсыс. Агроном Скоморохов со мый шуӧ мӧсъясӧс да куканьясӧс видзӧм йылысь:

1) Бур мӧс вердӧ ассьыс кӧзяинсӧ, лёк мӧскӧс лоӧ вердны кӧзяиныслы. Колӧ видзны сӧмын бур мӧсъясӧс.

2) Ӧшъясӧс быдтӧй сӧмын йӧла мӧсъяслысь и накӧд нӧйтчӧдӧй мӧсъяснытӧ. Кыдзи ён, дзоньвидза бать-мамлӧн овлӧны ён, дзоньвидза челядь, сідзи жӧ и скӧтлӧн.

3) Куканьясӧс быдтыны колӧ кужны. Колӧ кужны и бӧрйыны. Энӧ дышӧдчӧй лыддьыны нигаяс, кӧні гижӧма куканьясӧс быдтӧм йылысь. Омӧль кукань сетас крестьянинлы сӧмын убытка.

4) Куканьясӧс ӧшкӧд позьӧ ӧтлаавлыны сӧмын 18−20 тӧлысь тырӧм бӧрын. Колӧ первой бура быдтыны да ёнмӧдны, мед эськӧ лоӧ бур, уна йӧла мӧс.

5) Некор мӧсъясӧс энӧ тшыгйӧдӧй. Тшыгйӧдӧм бӧрын мӧслӧн йӧлыс ёна чинӧ, кӧть бӧрыннас ещӧ ёна верд.

6) Энӧ жалитӧй нянь мӧслы. Вештас став няньсӧ дай пӧльза на сетас.

7) Сёркни сикаса пуктасъяс — зэв бур мӧс кӧрымъяс дай меддонтӧмӧсь. Кӧдзӧй унджык сёркни да турнепс.

8) Вӧчалӧй шоныд-югыд гидъяс. Кыдзи мортлы долыд овны лӧсьыд керкаын — сідзи и мӧсъяслы лӧсьыд гидын.

9) Ӧтувтчалӧй унджыкӧн да видзӧй ӧтвылысь бур ӧшъясӧс.

10) Судзӧдӧй быдсяма пӧлӧс нигаяс, газетъяс да велӧдчӧй скӧт видзны.