ТУЙ ОЗ КОВ ТШЫКӦДАВНЫ

Миян обласьтын ёна тшыкӧдалӧны нарошнӧ туйяс, посъяс, с. в. Мукӧддырйи видзӧдан да, дзик на выль пос, а кодкӧ кералӧма нин, верстӧвӧй сюръяяс пӧрлӧдлӧны, туйбокса ва визувтан канаваяс ставсӧ тыртӧмаӧсь. Сы вӧсна сэсся туйясыс няйтчӧны, вӧлӧн мунны оз шогмы, посъяс киссялӧны, сійӧ и видзӧд, кор вӧлыдлӧн кокыс чегӧ либӧ ставнас усьӧ. Став тайӧ туй тшыкӧдӧмъясыс овлӧны йӧз пемыдлун вӧсна, найӧ гӧгӧрвотӧм вӧсна. Сэсся унаысь туйсӧ тшыкӧдлӧны нарошнӧ сиктса том йӧзӧн кулиганитігӧн, либӧ жугӧдлӧны посъяс, мед выльысь вӧчны тшӧктасны да нажӧтка лоӧ.

Революцияӧдз да бӧръя войнаыс дырйи сэтшӧм туй тшыкӧдӧмъяс вылас омӧля видзӧдлывлісны. Ӧні сійӧ омӧль уджъяссӧ вӧчысьяскӧд колӧ босьтчыны чорыда вермасьны. Миянлы колӧ, кыдз верман, тӧдмавны сэтшӧм туй тшыкӧдысьяс йӧзсӧ да сетавны найӧс народнӧй судъясӧ. Ми ӧнӧдз эгӧ на видзӧдлӧй, кыдзи колӧ, туйяс видзӧм вылӧ. Колӧ ӧнісянь босьтчыны та бердӧ чорыда. Быд туй тшыкӧдӧмысь, пос жугӧдӧмысь мыжаяссӧ колӧ корсявны.

Став волисполкомъяслы, сельсӧветъяслы, милиционеръяслы, туй удж нуӧдысь да гӧгӧрвоана йӧзлы колӧ висьтавлыны гӧгӧрвотӧм пемыд йӧзлы, кутшӧм ыджыд лёклун государстволы туй тшыкӧдӧмысь.