УЗЬЫСЬЯС, САДЬМӦЙ!

(Кулӧмдін уездувса Ыджыдвидз вӧл.)

Миян Ыджыдвиддзын восьтылісны кооперативнӧй кружок. Шленыс эм тырмӧмъя, сӧмын правленньӧыс буракӧ узьӧ — уджыс оз мун. Кружоксӧ восьтӧмсянь вӧлі сӧмын ӧти собранньӧ. Шленъяслӧн колӧ узьысьясӧс садьмӧдны.

Гырысь йӧзӧс велӧданінын велӧдчӧны допризывникъяс. Ӧні эмӧсь эськӧ мукӧд йӧз, кодъяс кӧсйӧны жӧ велӧдчыны, да велӧданіныс оз уджав. Ме чайта, уджавтӧмсьыс мыжа волисполком; колӧ сылӧн вӧрзьӧдны, мед уджыс мунны кутіс.

Волисполкомлӧн уджыс, ме ногӧн кӧ, зэв лёк. Секретарыс первой велӧдчис допризывникъяскӧд, сэсся, мыйӧн сэтысь локтіс, пырысьтӧм-пыр жӧ корисны обласьтӧ курс вылӧ. Овлӧ ещӧ сідзи: секретар — обласьтын, волисполкомса шлен муніс делӧясӧн уездӧ, председательӧс корис уезд сӧвещанньӧ вылӧ. Ставыс сійӧ веськалі ӧти пӧраӧ. Тӧдӧмысь сэки некутшӧм удж оз мун; пошта волас, да мунас бӧр, ог тӧд, кодкӧ примитлӧ оз. Крестьяна воласны да, сідз жӧ, видчӧмӧн мунасны бӧр.

Крестьяна скод вылын шуӧм серти, волисполком восьтӧ мӧда-мӧдлы отсасян комитет, сӧмын, бара жӧ, уджыс ёна водзӧ оз мун. Лӧсьӧдісны шленӧ пыран дон 25 ур, медбӧръя срокыс — май 1-й лун.

Волисполкомлӧн оз ков узьны, а колӧ помавны заводитӧм уджъяс. Сыысь кындзи, колӧ шыӧдчыны Обсоюзӧ, мед сійӧ эз вунӧд пӧра кежлӧ ыстыны судзӧдӧм бобӧнянь турун кӧйдыс.

Селькор.