ПАДЖГАЫН ЛӦСЬӦДІСНЫ ПӦЖАРНӦЙ ДРУЖИНА

Дружинасӧ лӧсьӧдны ёна чуйдӧдіс керка сотчӧм. — Эз кӧ сотчы керкаыс, колӧкӧ йӧзыс эз на зэв и пырны дружинаас. — Мукӧд сиктъясын колӧ нин ӧнісянь, сотчӧмъяс лотӧдз лӧсьӧдавны дружинаяс.

Паджгаын апрель 5-ӧд лунӧ вӧчлісны собранньӧ да шуисны восьтыны скӧтӧс да йӧзӧс лечитанінъяс да ещӧ скӧтӧс нӧйтчӧданінъяс. Стрӧитӧмсьыс став рӧскодсӧ крестьяна босьтӧны ас вылас. Сэсся шуисны лӧсьӧдны пӧжарнӧй дружина. Собранньӧ вылас и сэтчӧ гижсялісны. Паджгаын сотчыліс керка. Тшӧтш сотчис сэки амбар, сизим ыж, порсьпи да ӧти кукань. Тайӧ сотчӧм вӧснаыс дружинаӧ ещӧ нин ёна пырисны йӧзыд.

Кусӧдчан машинаыс Паджгаын куим. Сэсся зэв уна багыр эм. Ставыс куйлӧны волисполком дінын. Пыр кӧ эськӧ пӧжар вылӧ найӧс вайисны, вермисны кусӧдны керкатӧ. Нарошнӧсӧ йӧзыс сы вылӧ абу вӧлі пуктӧма, некод эз тӧд, мый вӧчны. Машинаясла кыкысь вӧлӧн ыстылісны. Помасигас вӧлисти машинатӧ вайисны. Вайиснысӧ эськӧ вайисны, да рукавыс мӧд машинасьыс веськалӧма — бара лои ветлыны рукавысла.

Сэки кӧ нин эськӧ вӧлі дружинаыс да юклӧма вӧлі йӧз костын пӧжар лоигкежлӧ став уджсӧ, керкатӧ кокньыда и кусӧдісны.

Мукӧд сиктса крестьяналы колӧ мӧвпыштны та йылысь да и пӧжар лотӧг нин, водзвыв лӧсьӧдавны кусӧдчан машинаяс, восьтавны дружинаяс.