ОТСАЛӦЙ ИНВАЛИДЪЯСЛЫ!

Мӧда-мӧдлы отсасян комитетъяс ӧнӧдз пыр отсасян удж инвалидъяслы эз на вӧчлыны.

Колӧ ӧтувтны инвалидъясӧс артельясӧ.

Обласьтувса вермытӧмъяслы отсалан юкӧд висьталӧм серти, мӧда-мӧдлы отсасян комитетъяс сиктъясын омӧля отсасьӧны инвалидъяслы. Ӧнӧдз комитетъясыс кӧнсюрӧ сӧмын чукӧртавлісны инвалидъяслы отсалӧм вылӧ сьӧм да ӧткымынлаын коръясӧкӧ кӧдзавлісны налысь муяссӧ.

Татысь ми аддзам, мӧда-мӧдлы отсасян комитетъяс отсалӧны инвалидъяслы корсюрӧ, пыр отсалан уджыс сэні оз мун. Татшӧм отсӧг оз вермы бурмӧдны инвалидлысь олӧмсӧ, оз ньӧти сійӧс кокньӧд.

Миянлы колӧ кыдзикӧ ещӧ мӧд ногӧн отсавны инвалидъяслы. Отсавны сідзи, мед эськӧ мӧда-мӧдлы отсасян комитетыслы эз вӧв сьӧкыд дай инвалидъяслы лои бура отсалӧма. Сэтшӧм отсалан ногыс эм. Мукӧдлаын комитетъяс аддзисны нин сійӧ туйсӧ, мунӧны нин сійӧ туйӧдыс. Найӧ чукӧрталӧны инвалидъясӧс артельясӧ. Став мӧда-мӧдлы отсасян комитетъяслы колӧ заводитчыны ӧтувтавны инвалидъясӧс артельясӧ. Торйӧн-торйӧн быд сиктын гашкӧ и этша инвалидыд да, став вӧлӧсьт улысь кӧ чукӧртан, лоас вель уна. Колӧ вӧчны вӧлӧсьтувса инвалидъяслысь собранньӧ, тӧдмӧдны найӧс артель уставӧн дай лӧсьӧдны артельясӧ. Сэтшӧм уставыс эм Вермытӧмъяслы отсалан юкӧдын, сэтысь позьӧ босьтны быд мӧда-мӧдлы отсасян комитетлы. Артельяс позьӧ лӧсьӧдны быдсикас ремеслӧ уджалысь инвалидъясысь. Медводдза кадъясас, дерт, мӧда-мӧдлы отсасян комитетъяслы лоӧ отсавны артельяслы кок йылас сувтны да ёнмыны. Сійӧ сьӧмыс комитетъяслӧн оз ло видзӧма весьшӧрӧ, сійӧ сӧмын буринӧ лоӧ меститӧма. Бӧрыннас артельыс ставсӧ бергӧдас дай комитетсӧ ёнмӧдас, бур уджалысь шленъяс сылӧн лоӧны.

Сідзкӧ, комитетъяс, отсалӧй инвалидъяслы!

Кызъюров.