МӦДА-МӦДЛЫ ОТСАСЯН КОМИТЕТЪЯС ДА КӦЙДЫС ЛӦСЬӦДӦМ

Комитетлы колӧ судзӧдны кӧйдыс гӧль крестьяналы.

Колӧ зільны весавны кӧйдыссӧ.

Колӧ тшӧтш сетны судзсьытӧм крестьяналы кокньӧдъяс машинаяс босьталігӧн.

Гӧль крестьяналӧн зэв унаысь оз овлывлы кӧйдысыс гӧриг-кӧдзигкежлас. Медыджыд отсӧгсӧ сэтшӧм гӧлиник йӧзыслы колӧ сетны мӧда-мӧдлы отсасян комитетъяслы. Налы медводз колӧ мунны паныд крестьяналы кӧйдыс судзӧдӧмӧн.

Комитетъяслы колӧ видзӧдны, мед кӧйдыс веськалӧ кытчӧ колӧ — гӧль крестьяна кӧзяйствоясӧ, сэсся кодъяслӧн кӧ овмӧсас неладнӧ лои: вӧлыс-ӧ, мӧскыс-ӧ уси, сотчис, с. в., сэсся гӧрдармееч семьяяслы. Мӧда-мӧдлы отсасян комитетъяслы колӧ тӧдмавны став сэтшӧм кӧзяйствояссӧ да кодлы мында кӧйдысыс колӧ, сэсся медвойдӧр и сетавны найӧлы. Сэсся комитетъяслӧн колан удж — отсавны сиктса гӧль крестьяналы кӧйдыс весавны да бурмӧдны (сортируйтны). Комитетъяслы колӧ зільны гӧль крестьяналы кӧйдыссӧ весавны зэв донтӧг.

Мӧда-мӧдлы отсасян комитетъяс вермасны отсавны судзсьытӧм крестьяналы уна сикас кокньӧдъясӧн (льготаясӧн): быдсяма пӧлӧс му-видз уджалан кӧлуй босьтігъясӧн прокатнӧй пунктъяс вылысь, машинаяс ньӧбигӧн, с. в. Став сійӧ кокньӧдъяссӧ сетӧны крестьяналы мӧда-мӧдлы отсасян комитетъяссянь сетӧм бумагаяс серти.