КУТШӦМ КӦЙДЫСӦН КОЛӦ КӦДЗНЫ

Крестьянин омӧля тӧдмалӧ кӧдзтӧдзыс чужанлунсӧ кӧйдыслысь. Сэсся кӧйдысъяс оз весавны (сортируйтны). Весавтӧм кӧйдысын эм быдсикас кӧйдысъяс: йӧн, нявда, мукӧд сикас. Посньыд кӧйдысысь, дерт нин, оз быдмы мича нянь, быдмас сэтшӧм жӧ посньыдик-жебиник туся. Киль кодь кӧйдыс вошӧ весьшӧрӧ. Лёк турун кӧйдысъясысь быдмасны му вылӧ уна лёк турун (йӧн да мукӧдтор). Лёк ёг турунъяс тыртӧны став му вывсӧ да мешайтӧны быдмыны няньлы. Лёк ёг турунъяс мулысь босьтӧны уна вын, вынтӧм му вылӧ нянь оз быдмы: ёга муын няньлы оз тырмы выныс.

Тайӧ табличаысь ми аддзам, кутшӧм кокньыдӧсь крестьяналӧн кӧйдысъяс дай кутшӧм омӧля чужӧны.

Быдмас нимъяс.	Крестьяналӧн сортируйттӧм кӧйдыс.		Шӧркоддьӧм сортируйтӧм кӧйдыс.
	Мый сьӧкта четверть (8 казеннӧй четверик).	Чужӧ сё тусь кӧйдыс пиысь.	Мый сьӧкта четверть (8 казеннӧй четверик).	Чужӧ сё тусь кӧйдыс пиысь.
Зӧр	5 пуд 20 пунт	74 тусь	6 пуд 10 пунт	90 тусь
Ид	7 „ 25 „	80 „	8 „ 20 „	96 „
Сю	8 „ 25 „	75 „	9 „ 25 „	97 „

Со кутшӧм омӧль сортируйттӧм кӧйдысыд шӧркоддьӧм сортируйтӧм кӧйдыс дінад! Лёк кӧйдыстӧ кӧдзӧм понда урожайыд миян зэв этша.

Воысь воӧ сортируйттӧм кӧйдысӧн кӧдзигӧн миян кӧйдысъясыд омӧльтчӧны: поснялӧны да кокняммӧны. Сортируйтігӧн став кокньыд кӧйдысыс да лёк ёг турун кӧйдысыс торъялӧны, кольӧны сӧмын мича гырысь кӧйдысъясыс. Сортируйтӧм кӧйдыс чужӧ ёнджыка.

Кӧсъянныд кӧ кӧйдысысь босьтны унджык пӧльза, кӧдзӧй сортируйтӧм кӧйдысӧн.

Пит.