ГАЗЕТӦ ГИЖЫСЬЯСЛЫ

Газетӧ гижысь отсалӧ Сӧвет власьтлы.

Миян газетӧ гижысьяс сиктъясын (селькоръяс) унаӧн на оз гӧгӧрбок лючки тӧдны ассьыныс удж йылысь, оз тӧдны, кутшӧм ыджыд буртор сетӧны найӧ Сӧвет власьтлы асланыс уджӧн. Сэсся оз тӧдны, кодӧс колӧ лыддьыны газетӧ гижысьӧн, код ногӧн сиктын олысь ёрт вермас лоны газетӧ гижысьӧн.

Медвойдӧр колӧ тӧдны: газетӧ гижысь (сиктса кӧть, карса кӧть) аслас уджӧн отсалӧ Сӧвет власьтлы нуӧдны уджсӧ, сувтӧдны бурджыка. Газетӧ гижысь газет пыр аслас сиктысь вештӧ лёк оланног, нелючки кодъяслыськӧ уджалӧм. Сійӧ висьталӧ газет пыр бура уджалӧм, тшӧктӧ мукӧдӧс сідзи жӧ уджавны.

Тӧдтӧмтор гижны оз ков.

Коммунист партия дай Сӧвет власьт ёна видзӧдӧны ӧні газетӧ гижысьяс вылӧ, налы уджсӧ отсалӧны нуӧдны, дорйӧны найӧс, кодкӧ кӧ кутас увтыртны нинӧм абуысь, лёк кутӧм вӧсна.

Сиктсянь кӧ газетӧ гижан кутшӧмкӧ нелючки уджалӧм, Сӧвет власьт тшӧктӧ сійӧ гижӧд серти удж нуӧданінъяслы корсьысьны, вештыны сійӧ нелючки уджалысь мортсӧ. Сідзкӧ быд газетӧ гижысьлы колӧ гижны сӧмын сэтшӧмтор, кодӧс сійӧ зэв нин бура тӧдӧ. Гижны содтавтӧг, ылӧдчытӧг. Оз ков вунӧдны — газетӧ кӧ гижан ылӧг, ачыд мыжман.

Кодъяс дор сулалӧ газетӧ гижысь сиктын? Дерт, медъёна гӧль да шӧркоддьӧма олысь крестьяна дор; найӧс дорйӧ, налы отсалӧ газет пыр, накӧд ӧтвыв мунӧ. Озыр крестьянаӧс, йӧз киӧн му-видз уджалысь мортӧс газетӧ гижысь ӧтдортӧ, сералӧ, вывті кӧ кутас топӧдны крестьянаӧс, гижысь юӧртӧ газет пыр.

Газетӧ гижысьӧс бӧрйыны оз ков.

Миян ӧні войдӧръя моз ӧткымын сиктъясын организацияяс бӧрйӧны газетӧ гижысьӧс. Кӧть мортыд оз кӧсйы гижны газетӧ, тшӧктӧны гижны. Колӧ эновтчыны ӧні газетӧ гижысьӧс бӧрйӧмысь. Газетӧ гижысь уджалӧ ас вӧляӧн, некод тшӧктытӧг.

Торъя права оз сетны.

Ӧткымынлаын, шочиника газетӧ гижысьяс лэптысьлӧны крестьяна водзын, пуктӧны асьнысӧ вылӧджык: со пӧ ме газетӧ гижысь, менам пӧ эм эскӧданпас сы вылӧ и быдтор, оз ков вунӧдны — газетӧ гижысьлӧн торъя права некутшӧм абу, оз сетсьы ни.

«Газетлы отсасян» кружокъяс йылысь.

Газетӧ гижысьяслы, вӧлӧсьтын кӧ найӧ кыкӧнӧсь, куимӧнӧсь либӧ унджыкӧн эмӧсь, колӧ ӧтувтчыны кружокъясӧ. Кружокъясын газетӧ гижысьяс велӧдчӧны, кыдзи бурджыка колӧ газетӧ гижны, лыддялӧны газетъяс крестьяналы, с. в. Миян быд сиктын газетӧ гижысьяс этшаӧнӧсь. Сідзкӧ бурджык лӧсьӧдавны «газетлы отсасян» кружокъяс. Сэтчӧ газетӧ гижысь кындзи вермасны пырны быдӧн, кӧсйӧны кӧ найӧ газетӧн тӧдмасьны, лыддьыны.

Эн пӧ.