ВӦЛӦСЬТУВСА БЮДЖЕТ ПАСЬКАЛӦ

Ӧні сӧвет власьт ёна зільӧ кыпӧдны вӧлӧсьтъясысь овмӧс. Медводдза уджӧ пуктыссьӧ вӧлӧсьтувса бюджет (приход-рӧскод) ёнмӧдӧм-паськӧдӧм.

Тайӧ став уджсӧ лӧсьӧдны эм СССР-са ЦИК бердын торъя комиссия. Тӧлысь сайын вӧлі тайӧ комиссияыслӧн заседанньӧ. Сэні вӧлӧсьтувса бюджет йылысь со мый шуисны:

Май тӧлысьӧдз видлавны выльысь став списоксӧ доход-рӧскод йылысь. Медым эськӧ унджык доход сюрис вӧлӧсьтъяслы. Уездъяс кутасны сӧмын лӧсьӧдавны (индавны) став уездувса да став вӧлӧсьтувса бюджетъяссӧ.

Вӧлӧсьтувса бюджетӧ сетны сельхозналогысь став содтӧдсӧ. Обласьтувса исполком кутас индавны, кутшӧм уездӧ мыйта сетны тайӧ содтӧдсьыс, уездувса исполкомъяс кутасны юклыны сійӧс быд вӧлӧсьтлы. Корсюрӧ вермас обласьтувса исполком став содтӧдсьыс 15−20 прӧчент кольны торъя уезднӧй исполкомъяслы уездувса бюджет содтӧм вылӧ либӧ гӧльджык вӧлӧсьтъяслы сетӧм вылӧ.

Сэсся шуисны сетны вӧлӧсьтъяслы, мыйта позяс, неналогӧвӧй доходысь пайтор. Сы вӧсна колӧ лӧсьӧдны быд уездын торъя комиссия. Сідзжӧ сетны мукӧд пӧлӧс доходысь (вӧр доходысь, мукӧд сэтшӧм государственнӧй доходысь, коді воӧ деревняясысь). Таысь кындзи, государственнӧй казнаысь местаяс вылӧ сетыштны отсӧг, служащӧйяслы отсалӧмысь ӧтдор, — школаяс лӧсьӧдны, больничаяс, туйяс, выль ногӧн му-видз уджалӧмъяс.

Юкны вӧлӧсьтъясын, кодъяслы кутас сетсьыны отсӧг, куим сикасӧ: вермана, шӧркоддьӧм да гӧль вылӧ.