КРЕСТЬЯНА ГАЗЕТ

Мый сетӧ газет.

Газет вӧчӧ ыджыд удж: висьтавлӧ ставмувывса олӧмысь выльторъяс, индалӧ асланым олӧмысь бурторъяс, омӧльторъяс, велӧдӧ выль ног овны-уджавны.

Газетъяс петӧны важӧнсянь нин, сё-мӧд во, сӧмын важӧнсӧ найӧ вӧліны капиталистъяслӧн да на дор олысьяслӧн.

Уджалысьяс вӧліны гӧльӧсь да велӧдчытӧмӧсь — тӧдӧмысь, ассьыныс газетъяс лэдзны дыр эз вермыны.

Медводдза рабочӧй газет пондіс петны во кызь вит сайын. Сэсянь рабочӧй газетъяс ёна содісны, ёнмисны. Медся ёна содісны революция бӧрын.

Крестьяна газетъяс революцияӧдз весиг эз вӧвлы. Найӧ пондісны кыптыны сӧмын Октябрса революция бӧрын.

Ӧні Сӧвет Республикаяс Союзын роч кывйӧн петӧ 134 крестьяна газет, мукӧд кывъясӧн — 57 газет.

Крестьяна газет лоӧ збыльысь крестьяна газетӧн сэк, кор крестьянаыс пондасны асьныс сэтчӧ гижны, кор газетсӧ быд крестьянин пондас гӧгӧрвоны, сьӧлӧмсьыс лыддьыны, кор вермас сійӧс судзӧдны ичӧт дон вылӧ.

Ӧнісянь петны кутас коми крестьяна газет.

Миян обласьтын сэтшӧм крестьяна газетыс эз на вӧв. «Югыд туй» унджыкысьсӧ петӧ рочӧн, став крестьянаыслы абу гӧгӧрвоана, да и судзӧдан доныс ыджыд. Сійӧн ӧнісянь пондас петны торъя газет «Коми сикт» быд вежонын (недельын) ӧтчыд. Сэтчӧ пондам гижны гӧгӧрвоана кывйӧн крестьяналы тӧдны коланторъяс.

«Югыд туй» судзӧдысьяслы «Коми сикт» пондам ыстыны быдӧнлы, газетыслысь донсӧ содтытӧг. Крестьяналӧн позяс «Коми сикт» судзӧдны торйӧн, 20 урӧн (20 коп.) тӧлысь.

Тайӧ номер воӧм бӧрын гижалӧй редакциялы, мыйясджык да кыдзиджык колӧ гижавны, мед гӧгӧрвоанаджык да мусаджык лоӧ газетыс.

Сэсся гижалӧй асланыд сиктса олӧм йылысь, мый буртор эм, мый омӧльыс, кутшӧма видз-му уджалӧм мунӧ, кыдзи крестьяна олӧны, кутшӧма волисполкомъяс, кооперативъяс, мӧда-мӧдлы отсасян комитетъяс уджалӧны.

Сэки газетысь быд крестьянин пондас аддзыны ставмувывса да асланым обласьтувса олӧмсӧ, пондас велӧдчыны выль ног олӧмӧ, оз пондыны вежӧрттӧм йӧзлысь сӧрӧмъяссӧ кывзыны.

Сӧвет власьт сійӧ газетысь жӧ пондас тӧдны, мыйӧн нуждайтчӧ деревня, кыдзи колӧ отсавны сиктлы, мый вӧчны.

Колӧ босьтчӧдны коми крестьяна газет.

Сійӧн став коми крестьяналы колӧ босьтчӧдны ассьыным крестьяна газет, гижавны сэтчӧ ёнджыка да унджык судзӧдны.

Газет кружокъяслы колӧ тӧдмӧдны крестьянаӧс тайӧ газетӧн да корсьны-чукӧртны судзӧдысьясӧс, мед ӧні кежлӧ быд дас керка вылӧ вӧлі нин ӧти газет судзӧдысь, водзӧ мырсьыны судзӧдны быд вит керка вылӧ газет (кӧнсюрӧ судзӧдӧны нин быд куим керка вылӧ ӧти газет).

Ставӧн кӧ ӧтвылысь босьтчам крестьяна газет ёнмӧдны, кыпӧдны, разӧдны — вӧчам зэв ыджыд удж; отсалам крестьяналы восьса синмӧн видзӧдлыны Сӧвет власьт вылӧ, выль ног олӧм лӧсьӧдӧм вылӧ, матыстам коми крестьянаӧс культураланьӧ, босьтчӧдам ассьыным Коми обласьт.

Мед жӧ ёнмас, сӧвмас, паськалас коми крестьяна газет!