ТИКӦН ГУ ВЫЛЫН Апрель 7-ӧд лунӧ кулӧма патриарх Тикӧн. Радио юӧрЕНЛЫ ЭСКЫСЬ (лыддьӧдлӧмӧн): — Бырин тай, бырин, Гуӧ тай пырин... Пыр кежлӧ миянысь дзебсин... Майбырӧй мортӧй, Зарниӧй бордӧй, Енэжӧ шлывкнитін, лэбзин... Колин тай, колин, Миянӧс колин... Кыдзи нӧ тэтӧг ми олам? Суас кӧ шогыс, Ен дінӧ могыс, Код дінӧ сэки ми волам?.. Тэнад ми ыжъяс... Миянлысь мыжъяс Ен водзын ёна тэ вештін. Вичкоын нэмтӧ Казьтывны ентӧ, Гажаа сьывны тэ эштін... Миянӧс прӧстит, Благӧслӧви-прӧстит, Тӧждысь жӧ кольысьяс вӧсна. Мӧдарын райын, Кытчӧ тэ каян, Сетасны сарство небеснӧ... ЕНЛЫ ЭСКЫТӦМ (гу кодйысьыс): — Бырин тай, бырин, Гуӧ жӧ пырин... Смертьыд тай быдӧнлы инмӧ... Майбырӧй мортӧй, Омӧлик ёртӧй, Тэ понда киссис жӧ синва. Власьт вылӧ скӧрмин — Кыдзи-мый вермин Тшыгъялысь войтырӧс пӧдтін: Вичкоыд бовгӧ — Тшыгъялысь Волга Челядьсӧ пӧдтӧ... Колльӧдны нэмтӧ, Куравны сьӧмтӧ Вичкоӧ юравны пырин. Ылӧдлін райӧн, Корлін тэ «вайӧн», Ёна нин «ыжъястӧ» шырин... Ӧтикӧн чинім — Ӧдва и мынім!.. Ӧдва терпенньӧным судзсис... Видлы жӧ «райтӧ», Катӧд тшӧтш яйтӧ — Кокъясад некод оз кутчысь...
