СӦВЕТ ГОСУДАРСТВОЛӦН РӦСКОДЪЯС

Видз-му уджалӧм вылӧ сетсьӧ медуна

Важӧн сардырся власьт вӧлі быд 100 шайтысь 40 шайтсӧ видзӧ мукӧд государствояслы уджйӧзъяс мынтӧм вылӧ да ассьыс армия видзӧм вылӧ.

Ӧні Сӧвет власьт мукӧд государствоясӧ удждысяна (заём) серти ньӧти оз мынты. Гӧрд армия вылӧ 100 шайтысь видзӧ сӧмын 17 шайт.

Сӧвет власьт мукӧд государствояс серти медэтша видзӧ сьӧм учрежденньӧяс кутӧм вылӧ.

Ӧтласа рӧскодъяс вылӧ миян Сӧвет Союз быд республикаяслы сьӧмсӧ рӧскодуйтӧ став Союзса сьӧмысь.

Ӧтласа рӧскод кындзи быд Сӧвет республикалӧн эм асланыс рӧскодъяс.

Сэтшӧм рӧскодъясыс быд республикалӧн мунӧны со мыйяс вылӧ: йӧзӧс велӧдӧм вылӧ, йӧзлысь дзоньвидзалун кутӧм вылӧ, уджавны вермытӧмъяслы пенсия вылӧ да мукӧд сикас сэтшӧм рӧскодъяс вылӧ.

Видз-му уджалан Народнӧй Комиссариатӧн рӧскодуйтсьӧ 250 миллион шайт. 55 миллионыс сы пиысь мунӧ крестьяналы коланторъяс (нуждаяс) вылӧ.

Куш крестьяналы мунӧ Сӧвет Союзлӧн 225 миллион шайт. Сэсся налы жӧ мунӧ мыйкӧ мында запасын государствоӧн кутан сьӧмыс. Содтам кӧ сійӧс — ставыс крестьяналы мунӧ 300 миллион шайтӧдз.

Торъя (чрезвычайные) рӧскодъяс Сӧвет государстволӧн тайӧ во кежлӧ лӧсьӧдӧма 280 миллион шайт. 120 миллион шайтыс сэтысь мунӧ пабрик-заводъяс вылӧ да электрификация вылӧ, 122 миллион шайт — крестьяналысь овмӧс кыпӧдӧм кузя, 38 миллион шайт — Ленинград кар дзоньтавны, ойдлӧмӧн жугавлӧм да торкласьӧм инъяссӧ да коммунальнӧй (ӧтласа) банкъяс лӧсьӧдӧм вылӧ.

Пабрик-заводъяс бурмӧдӧмӧн да электрификациятӧ нуӧдӧмӧн донтӧммӧ тӧвар. Сыысь, тӧдӧмысь, бурыс лоӧ крестьянинлы жӧ.

Сэсся ӧд 122 миллион шайт урчитӧмӧн Сӧвет власьтлӧн торйӧдӧма крестьяналысь овмӧс кыпӧдны: нянь артмытӧминъясын крестьяналы няньӧн да уджалӧмӧн отсавны. Тайӧ 122 миллион шайтсьыс 8 миллион шайтсӧ лӧсьӧдӧма сиктса кооперация кыпӧдны, кӧні гӧль вӧснаыс кооперативыс оз вермы крестьяналы вайны (судзӧдны) карса пабрик-заводса тӧварсӧ донтӧгджык да тырмымӧн.

Сідзкӧ Сӧвет государство торъя рӧскодысь быд 100 шайт сьӧмысь 44 шайтыс мунӧ сиктса крестьянаяслы, 42 шайт пабрик-завод кыпӧдӧм вылӧ да 14 шайтыс каръяс дзоньталӧм вылӧ.

Тайӧ ичӧтик висьталӧмысь позьӧ аддзыны: медъёна Сӧвет власьт сетӧ сьӧм аслас бюджетысь видз-му уджалӧм бурмӧдӧм да кыпӧдӧм вылӧ.

А. Торбин.