ВОЛСЯЫН

(Сыктыв уездын)

РКП (б) партияын 3 шлен, кандидатыс абу.

РЛКСМ ячейкаын 7 шлен да 1 кандидат. Велӧдчан удж налӧн мунӧ омӧля. Март помӧдз сэтшӧм уджыс налӧн пӧшти эз вӧв.

Югдӧдчан-велӧдчан удж. Вӧлӧсьтын эм лыддьысян керка, 3 школа да 3 жӧ гырысь йӧзӧс грамотаӧ велӧданін. Декабр тӧлыссянь лыддьысян керкасӧ сюйисны поп керкаӧ. Лыддьысян керкаын эм библиотека, волывлӧны сэтчӧ морт 250 гӧгӧр, ёнджыкасӧ том йӧз да велӧдчысь челядь. Ме ногысь, колӧ лыддьысян керкаас уджсӧ бурмӧдныджык, мед эськӧ волывлісны тшӧтш гырысь йӧз.

Школаясын велӧдчӧ 260 морт гӧгӧр. Став велӧдчысь арлыдасӧ лыддьӧмӧн кӧ, 100 челядь пытшкысь 75-ыс велӧдчысь, 25-ыс оз велӧдчыны. Школаясын велӧдысьяс ставыс 7 морт, йӧз костын найӧ оз уджавны, весиг ӧтчыд на эз чукӧртлыны велӧдчысьяслысь бать-мамсӧ.

Вадыбса гырысь йӧзӧс велӧданінын уджыс оз мун. Сы йылысь мӧдӧдӧма акт Уисполкомӧ. Мукӧд велӧданінъясас (Волсяса да Кунибса) уджалӧны бура, сӧмын волисполкомлӧн колӧ Волсяса велӧданінсьыс велӧдысьсӧ (Кузьбожев ёртӧс) босьтны аслас ки улӧ, мед эськӧ сійӧ эз сэтшӧма ю.

Кооперативын удж кутіс мунны лӧсьыда. Март 20-ӧд лун кежлӧ шленыс вӧлі 170 гӧгӧр нин. Яткаӧ тӧварла мунігӧн лавкаас деньгаыс вӧлі сӧмын 200 шайт гӧгӧр, а вайисны тӧвар 2400 шайт дон. Сійӧ деньгасӧ унджыксӧ чукӧртлісны шленъяслысь (волисполком пуктыліс жӧ местнӧй бюджетысь 750 шайт). Ӧні лавкаын эм уна пӧлӧс тӧвар; крестьяна аддзыны кутісны кооперативлысь бурсӧ.

Удждысян тӧварищество миянын абу. Нажӧтка вылӧ мунысьяс да мукӧд коланінӧ удждысьлісны Межадорса тӧвариществоысь. Ӧні ставыс нин мынтӧмаӧсь бӧр, сӧмын кольӧма мынтысьтӧм ӧти Леонтий Вас. Ёкышевлӧн, коді век видзӧдӧ эновтчыны да нюжйӧдлыны. Межадорса удждысян тӧвариществоӧ Волсяса пырӧмаӧсь шленӧ морт 90.

Вотъяс. Март 20-ӧд лун кежлӧ видз-му вот (сельхозналог) мынтісны 85 прӧчент гӧгӧр. Волисполком шуӧ, медбӧръя срок кежлӧ пӧ мынтасны ставсӧ. Скӧтысь страхӧвӧй ӧктӧд локтӧ омӧля: март 20-ӧд лунӧдз мынтісны 60 прӧчент гӧгӧр. Йӧзыс тайӧ выль пӧлӧс ӧктӧдас эз на велавны, сійӧн и топыдджыка мынтӧны.

Татчӧс.