КРЕСТЬЯНСКӦЙ ИНТЕРНАЦИОНАЛ СӦВЕТЛӦН ПЛЕНУМ

Апрель 9 лунын воссис мӧд пленум ставмувывса крестьянскӧй Интернационал Сӧветлӧн. Воддза кывйын Калинин ёрт шуис: ставмувывса крестьянскӧй Интернационаллӧн пӧ первойя уджыс — кыпӧдны крестьяналысь юр вежӧрсӧ, мед гӧгӧрвоасны найӧ: кытчӧдз капиталистъяс кутасны юравны, став сьӧкыдыс кутас усьны крестьяна вылӧ, оз вермы лоны налы кокньыд олӧм.

Мӧскуа. Ставмувывса крестьяна Интернационал Сӧветса пленум вылын Крестинтернса удж йывсьыс висьталіс Домбаль ёрт. Сійӧ шуис: Крестьянскӧй Интернационал пӧ удж нуӧдӧ уна государствоса крестьяна кост. Францияын лои ӧні крестьяналӧн Сӧвет, Италияын воссис крестьянаӧс дорйысь чукӧр (лига защиты крестьянства). Мӧда-мӧдыскӧд гижасьӧны да тӧдмалӧны олӧмсӧ Болгарияса, Румынияса, Грецияса да мукӧд государствоса крестьяна организацияяс. Заводитӧны уджавны крестьяна организацияяс Америкаын, Испанияын, Японияын, Китайын, Индияын да мукӧдлаын. Сэсся Домбаль ёрт шуӧ, колӧ пӧ ёнджыка уджавны крестьянаӧс рабочӧйяскӧд ӧтлаалӧм вылын; индавны пӧ колӧ крестьяналы туй асьнысӧ кокньӧдӧм вӧсна водзсасигӧн.